ملک معاشی بحران توں گزردا پئے ایندی ترقی سانڳے اساکوں رل تے کم کرݨا ہوسی ۔وفاقی وزیر اویس لغاری

ڈیرہ غازی خان۔ 16 جون (اے پی پی):وفاقی وزیر توانائی سردار اویس احمد خان لغاری آکھیے پاکستان مسلم لیگ دی حکومت ہمیشہ عوام دی فلاح و بہبود اتے پبلک سروسز دی بہتری سانڳے کم کیتن ،عوامی مسئلیں دا وختی حل ساݙی ترجیح رہیے ملک معاشی بحران توں گزردا پئے ایندی ترقی سانڳے اساں ساریں کوں رل تے کم کرݨا ہوسی ۔ اے ڳالھ انہاں کمشنر آفس ڈیرہ غازی خان اچ اجلاس دی صدارت کریندے آکھی اے ۔اجلاس اچ سردار محمد جمال خان لغاری،رکن قومی اسمبلی سردار عمار اویس خان لغاری،ایم پی اے سردار احمد خان لغاری،مسلم لیگی رہنما سردار اسامہ فیاض لغاری اتے ٻئے ضلعی افسران شرکت کیتی۔ سردار اویس خان لغاری آکھیے اساں اوکھے حالات اچ ملک دی بھڄ دھرک سنبھالی اے جݙاں جو عوامی خدمت دا جذبہ رکھیندے ہوئیں ملک دے ترقی سانڳے نیک نیتی نال کم کریندے پیوں ۔