پی آئی اے، سٹیل ملز تے ٻئے اداریں کوں پبلک پرائیویٹ پارٹنرشپ تے گھن ونڄݨ نال مسئلے حل تھی سڳدن ، سید خورشید شاہ

اسلام آباد۔23جون  (اے پی پی):پاکستان پیپلز پارٹی دے رہنماء تے رکن قومی اسمبلی سیدخورشیداحمدشاہ آکھیے جو پی آئی اے، سٹیل ملز اتے ٻئے اداریں کوں پبلک پرائیوٹ پارٹنرشپ تے گھن ونڄݨ نال مسئلے حل تھی سڳدن ۔ قومی اسمبلی اچ آندے مالی سال دے بجٹ تے بحث اچ حصہ گھندے ہوئیں انہاں آکھیے کوئی وی مسئلہ حل کرݨ توں پہلے ساریں توں بنیادی ڳالھ ایں مسئلے کوں منڈھوں ݙیکھݨا پوندے ۔ ایں ملک دا ساریں توں وݙا مسئلہ آبادی دا ودھݨ اے ۔ انہاں آکھیے 1948 اچ پاکستان دی آبادی 3کروڑ 30 لکھ ہئی ۔2010  اچ پاکستان دی آبادی 11 کروڑ 50 لکھ تھی اتے ہݨ 2024 اچ اے آبادی 24 کروڑ تئیں پڄ ڳئی اے ایں مسئلے تے اساکوں توجہ ݙیوݨی پوسی نتاں جتنے وی بجٹ بݨا گھنو بہتری کائناں آسی ایں ویلھے آبادی ودھݨ دی شرح 2.6 فیصد اے لمحہ فکریہ ہے جو جݙاں اے آبادی 40 کروڑ تے پڄ ویسی تاں او ویلھے اساں کیا کریسوں آبادی دے مسئلے تے قومی اسمبلی دا ھک انڄ سیشن سݙ تے تجویزاں ڳھدیاں ونڄن جیویں آبادی ودھسی مسئلے وی ودھسن ۔