صدر مملکت دی اڳواݨی اچ اہم سکیورٹی اجلاس، کچے دے علاقے اچ آپریشن دا فیصلہ

سکھر۔24جون(اے پی پی):صدر مملکت آصف علی زرداری آکھیے جو ریاست دے اڳو ہتھیار سٹݨ آلے کچے دے جرائم پیشہ لوکاں کوں قومی دھارے اچ ڳھن آیا ونڄے، کچے دے لوکاں دی سماجی و اقتصادی حالت سدھارݨ دی لوڑھ اے، علاقے اچ سڑکاں، صحت و تعلیم دا بنیادی ڈھانچہ وٹاوݨ دی لوڑھ اے۔ اے ڳالھ انہاں سکھر دے دورے ویلھے سندھ اچ سیکیورٹی، امن و امان دی صورتحال بارے اجلاس دی اڳواݨی کریندے آکھی۔ اجلاس اچ صدر ہدایت کیتی جو گھنائونے جرائم اچ ملوث کٹر مجرماں دے خلاف سخت کارروائی کیتی ونڄے اتے معمولی جرائم اچ ملوث لوکاں دی بحالی کر تے ملک دا ذمہ دار شہری ٻݨایا ونڄے، کچے دے قبائلی سرداراں دا ہک قومی جرگہ سݙیا ونڄےڄیڑھا علاقے اچ امن و امان، سیکورٹی صورتحال چنڳی کرݨ کیتے مقامی آبادی نال ڳالھ مہار کرے، قومی جرگہ جرائم روکݨ، علاقے کوں ہتھیاراں توں پاک کرݨ کیتے کردار ادا کریسی۔ اجلاس اچ وفاقی وزیر داخلہ محسن نقوی، ایم این اے سید خورشید شاہ، وزیراعلی سید مراد علی شاہ، اسپیکر سندھ اسمبلی، صوبائی وزرا، وفاقی، صوبائی، رینجرز اتے ملٹری حکام وی موجود ہن۔ اجلاس اچ سندھ دی امن و امان دی صورتحال تے بریفنگ ݙتی گئی۔ اجلاس اچ پولیس اتے رنجرز ولوں انڄھ انڄھ بریفنگ ݙتی ڳئی اتے امن و امان سانڳے اقدامات دا ݙسایا ڳیا۔ اجلاس اچ منشیات فروشی روکݨ، صوبے دے داخلی راستیاں دی سخت نگرانی کیتے ٻیاں چوکیاں ٻݨاوݨ، سمارٹ کیمرے لاوݨ تے غور کیتا ڳیا۔ اجلاس پولیس فورس کوں جدید ہتھیار و آلات ݙیوݨ، مناسب انسانی وسائل، لاجسٹکس اتےا ستعداد ودھاوݨ دی ہدایت کیتی۔