پاکستان اتے تاجکستان دا ݙوطرفہ تعلقات، تجارت و سرمایہ کاری ودھاوݨ تے اتفاق، وزیراعظم شہبازشریف اتے تاجک صدر امام علی رحمان دی کٹھی پریس کانفرنس

دوشنبے ۔2جولائی(اے پی پی)پاکستان اتے تاجکستان مختلف شعبیاں اچ ݙوطرفہ تعاون اتے تعلقات ٻئے تکڑے کرݨ دا عزم کریندے زراعت، صحت، تعلیم، تجارت اتے سرمایہ کاری دے ودھارے کیتے رل تے کم کرݨ تے اتفاق کیتے۔ اے اتفاق دوشنبے اچ ملاقات توں بعد وزیراعظم شہباز شریف اتے تاجکستان دے صدر امام علی رحمان کٹھے پریس کانفرنس کریندے کیتے۔

وزیراعظم محمد شہباز شریف آکھیے جو تاجکستان ساکوں سر اکھیں تے آکھیے، ایویں لڳدے ڄیویں اساں اپݨے ݙوڄھے گھر آئے ہووں، اساں کئی مفاہمتی یادداشتاں تے دستخط کیتن جیندے نال ݙوہاں ملکاں وچال تعلقات ٻئے ڳھاٹے تھیسن، میں انہاں معاہدیان تے مشکور ہاں جو ایندے نال ساݙے ٻھراواں آلے تعلقات تکڑے تھیسن اتے ڳانݙھا ودھسی، میں تاجسکتان نال رل تے کم کرݨ چاہنداں، اساں آپسی تعلقات ودھاوݨ خاص کر زراعت، صحت، سرمایہ کاری، تجارت ودھاوݨ سودھا مختلف شعبیاں اچ ڳانݙھا چاہندوں، ٹرانسپورٹ اتے گڈز کراچی بندرگاہ توں افغانستان دے رستے تاجکستان تئیں شئیں پڄدیان پن، تاجکستان اتے پاکستان وچال سڑک اتے ریل نیٹ ورک ٻیا تکڑا تھیوݨا چاہیدے۔ تاجکستان دے صدر اتے وفداں دی سطح تے ملاقاتاں اچ ݙوطرفہ تعاون کیتے مثبت اتے نتیجہ خیز ڳالھ مہاڑ تھئی اے، ݙوطرفہ تجارت و سرمایہ کاری دے ودھ مواقع ہین، تجارتی حجم ودھاوݨ کیتے سالانہ بنیاداں تے اہداف رکھݨے چاہیدن۔ انہاں آکھیا جو ساکوں کثیر جہتی تجارتی راہداریاں ڳولݨیاں ہوسن، چین، تاجکستان اتے افغانستان وچال تجارتی راہداری دا حصہ ٻݨݨ چاہندے ہیں۔

وزیراعظم آکھیا جو تاجکستان اتے پاکستان دہشت گردی نال متاثرہ ملک ہین، پاکستان کئی سال ایں لعنت کوں ٻھڳتیے، انسانی زندگیاں اتے معاشی نقصانات دی شکل اچ ودھ ملھ چکائے، دہشت گردی مکاوݨ کیتے ارباں روپے دا معاشی باھر چاتے، سیکڑاں جاناں قربان کیتن، پوری پاکستانی قوم دہشت گردی نال متاثر تھئی اے، پاک فوج دہشت گردی دا بہادری نال مقابلہ کیتے اتے ایں ناسور دی پاڑ پٹݨ کیتے کے بے مثال قربانیاں ݙتن، 17-2018ء اچ اساں دہشت گردی مکاوݨ اچ کامیاب تھی ڳئے ہاسے ٻھل بدقسمتی نال اے لعنت وی آڳئی اے، کٹھیاں کوششاں نال اساں ملک توں دہشت گردی کوں مکا تے رہسوں، چاہندے ہیں جو پاکستان اتے تاجکستان دہشت گردی مکاݨ کیتے رل تے کم کرن، امن نال ہی خطے اچ خوشحالی آسی۔ وزیراعظم آکھیے جو غزہ اچ فلسطینیاں تے مظالم تھیندے پن، 40 ہزار فلسطینیاں کوں شہید کر ݙتا ڳئے جیندی پاکستان مذمت کریندے۔ انہاں آکھیے جو بھارت دے قبضے اچ جموں و کشمیر اچ ڄیڑھا کڄھ تھیندا پئے او قابل مذمت اے، جنوبی ایشیاء اچ پائیدار امن کیلئے اقوام متحدہ دی سلامتی کونسل دیاں قرارداداں دے مطابق مسئلہ کشمیر حل کیتا وںڄے۔ کشمیریاں کوں انہاں دا عالمی سطح تے منیا ہویا حق، حق خودارادیت ملݨا چاہیدے۔ انہاں امید کیتی جو کاسا 1000 منصوبہ آندے سال مکمل تھی ویسی جیندے نال خطے اچ خوشحالی آسی، پاکستان اتے تاجکستان سرکاری پاسپورٹاں کوں ویزہ توں مستثنیٰ کرݨ دے سمجھوتے تے دستخط کیتن۔ ایں موقع تے پاکستان اتے تاجکستان وچال مختلف شعبیاں اچ معاہدیاں اتے مفاہمتی یادداشتاں تے وی دستخط کیتے ڳن۔