کہیں وی ملک دی ترقی اچ تریمتاں دا کرداربنیادی حیثیت رکھیندے، سید یوسف رضا گیلانی

اسلام آباد۔8مارچ(اے پی پی) چیئرمین سینیٹ سید یوسف رضا گیلانی تریمتاں دے جگ ݙیھاڑ تے آپݨے سنھیے اچ آکھیے جو کہیں وی ملک دی ترقی اچ تریمتاں دا کردار بنیادی حیثیت رکھیندے ،تریمتاں کوں بااختیار بݨائے بغیر تے انھاں دی صلاحیتاں کوں قومی ترقی اچ شامل کیتے بغیر ھک مضبوط اتے خوشحال معاشرے دا قیام ممکن کائنی۔ سینیٹ سیکرٹریٹ توں جاری بیان اچ چیئرمین سینیٹ آکھیے اسلام تریمتاں کوں عزت، وقار اتے حقوق ݙتن تے ہر قسم دے صنفی امتیاز دی مخالفت کیتی اے ۔ انہاں زور ݙتے جو تریمتاں کوں زندگی دے سارے شعبیں اچ مساوی موقع ݙیوݨ کیتے اجتماعی کوششاں ناگزیر ہن۔ انہاں آکھیے تعلیم، صحت، معیشت، سیاست اتے ٻئے سماجی شعبیں اچ تریمتاں دی شرکت تے قیادت کوں ودھارا ݙیوݨ دی اہم لوڑھ اے۔ سید یوسف رضا گیلانی ایں موقع تے بینظیر بھٹو شہید کوں خراج عقیدت پیش کریندے آکھیےاو نہ صرف پاکستان بلکہ پوری مسلم دنیا دی پہلی تریمت وزیراعظم ہن، جنہاں تریمتاں دے حقوق، جمہوریت دے استحکام اتے سماجی ترقی سانڳے بے مثال جدوجہد کیتی۔ چیئرمین سینیٹ تحریکِ پاکستان دے دوران تریماں دے تاریخی کردار کوں اجاگر کریندے محترمہ فاطمہ جناح، بیگم رعنا لیاقت علی خان تے ٻئی تریمت رہنماواں دی جدوجہد دی تعریف کیتی ۔ انہاں آکھیے پاکستان دی تاریخ گواہ اے تریمتاں ہر دور اچ قومی ترقی اچ نمایاں کردار نبھائے تے او اڄ وی ملک دی خوشحالی اتےاستحکام اچ چنڳاں حصہ گھندیاں پئن ۔ سید یوسف رضا گیلانی امید ظاہر کیتی جو پارلیمان اتے حکومت تریمتاں دی فلاح و بہبود، انھاں دے حقوق دے تحفظ تے انہاں کوں قومی ترقی دے دھارے اچ مزید موثر انداز اچ رلاوݨ سانڳے آپݨی کوششاں جاری رکھیسوں