توسیعی رینج دے فتح-4 کروز میزائل دا کامیاب تجربہ پاکستان دی دفاعی خود انحصاری آلے پاسے اہم قدم اے، چیئرمین سینیٹ

اسلام آباد۔7 اکتوبر (اے پی پی) چیئرمین سینیٹ سید یوسف رضا گیلانی پاکستان دے مقامی طور تے تیار کیتے ڳئے فتح-4 کروز میزائل دے توسیعی رینج آلے ورژن دے کامیاب تجربے تے پاک فوج، سائنس داناں، انجینئراں تے دفاعی ٹیکنالوجی دے ماہرین کوں مبارکباد ݙتی اے۔ سینیٹ سیکرٹریٹ توں جاری بیان دے مطابق چیئرمین سینیٹ آپݨے سنیھے اچ آکھیا جو فتح-4 دا کامیاب تجربہ پاکستان دی ودھدی ہوئی سائنسی تے تکنیکی صلاحیتاں تے دفاعی خود انحصاری آلے پاسے اہم قدم اے۔ انہاں جدید ایویونکس تے نیویگیشن ٹیکنالوجی توں لیس نظام دی تیاری اچ کردار ادا کرݨ آلے سائنس داناں تے انجینئراں دی کوششاں کوں سراہیا۔ انہاں آکھیا جو اے کامیابی پاک فوج تے ملکی سائنسی برادری دی پیشہ ورانہ مہارت تے صلاحیتاں دا مظہر اے۔ چیئرمین سینیٹ ایں عزم دا اظہار کیتا جو پاکستانی سائنس دان تے انجینئر جدید ٹیکنالوجی، قومی سلامتی تے ملکی ترقی اچ آپݨا موثر کردار جاری رکھیسن۔ چیئرمین سینیٹ کامیاب تجربے تے پوری قوم کوں وی مبارکباد ݙیندے ہوئیں آکھیا جو ایہوجہیاں کامیابیاں قومی اعتماد کوں مضبوط تے ملکی خودمختاری، سلامتی تے دفاع دے تحفظ دے عزم کوں ٻیا مستحکم کریندن۔