شمالی وزیرستان تے مستونگ اچ سکیورٹی فورسز دی کارروائیاں، 18 دہشت گرد ہلاک

راولپنڈی۔7 اکتوبر (اے پی پی) شمالی وزیرستان تے مستونگ اچ سکیورٹی فورسز دیاں کارروائیاں وچال18 دہشت گرداں کوں ہلاک کر ݙتا ڳیا۔ سکیورٹی ذرائع دے مطابق، سکیورٹی فورسز ’’عزمِ استحکام وژن‘‘ دے تحت شمالی وزیرستان تے گردونواح اچ موثر تے کامیاب انٹیلی جنس بیسڈ کارروائی کریندیں ہوئیں فتنہ الخوارج دے 13 دہشت گرداں کوں جہنم واصل کر ݙتا۔ فورسز دہشت گرداں دی نقل و حرکت تے مسلسل نظر رکھے ہوئے ہن اتے موقع ملدے ای انہاں دے ٹکاݨیاں تے فیصلہ کن حملہ کیتا۔ حکام دا آکھݨ اے جو ملک توں دہشت گردی دے مکمل خاتمے تے پائیدار امن دے قیام تئیں فورسز دا اے عزم پوری شدت نال جاری رہسی۔ مستونگ، بلوچستان اچ ’’آپریشن ردالفتنہ 3‘‘ دے تحت سکیورٹی فورسز فتنہ الہندوستان دے خلاف کارروائی کریندیں ہوئیں 5 دہشت گرداں کوں ہلاک کر ݙتا۔ اے آپریشن مستونگ دے علاقیاں سیاپشت تے کلی گشتری اچ کیتا ڳیا۔ ہلاک تھیوݨ آلے دہشت گرداں دے قبضے توں وݙی مقدار اچ اسلحہ تے گولہ بارود برآمد تھیا۔ علاقے اچ ٻئے ممکنہ شرپسنداں دی بھال کیتے سرچ تے کلیئرنس آپریشن جاری اے۔