قائداعظم محمد علی جناح دی جدوجہد اتے اصول پسندی نوجوان نسل کیتے مشعلِ راہ اے: عطاء اللہ تارڑ

اسلام آباد۔ 25 دسمبر(اے پی پی) وفاقی وزیر اطلاعات و نشریات عطاء اللہ تارڑ آکھیے جو قائداعظم محمد علی جناح دی جدوجہد اتے اصول پسندی نویں نسل کیتے مشعلِ راہ اے، قائداعظم اپݨی پوری زندگی اچ کݙاہیں وی اصولاں تے سمجھوتہ نئیں کیتا۔ اے ڳالھ انہاں کنونشن سینٹر اچ ”قائد کا پاکستان۔ اڑان پاکستان“ دی تقریب نال خطاب اچ آکھی۔ تقریب اچ وفاقی وزیر منصوبہ بندی احسن اقبال، وزیراعظم دے معاون خصوصی طارق فاطمی اتے ٻئے اہم شخصیات وی موجود ہن۔ وفاقی وزیر اطلاعات آکھیا جو ایں قسم دے پروگراماں نال قائد دی زندگی، افکار، وژن اتے اصولاں کوں سمجھݨ اچ ٻہوں آسانی تھیسی۔ 1876ء اچ وزیر مینشن کراچی اچ ڄمݨ آلے محمد علی جناح دی زندگی نوجواناں کیتے مشعلِ راہ اے۔ قائداعظم دے ترائے سنہری اصول “اتحاد، تنظیم اتے یقینِ محکم” ہی انہاں دی کامیابی دی بنیاد ہن۔ انہاں آکھیا جو 1892ء اچ قائداعظم صرف 16 سال دی عمر اچ لندن ونڃ تے اپرنٹنس شپ کیتی اتے ایں دوران قانون دے شعبے کوں اپݨے کیریئر دے طور تے چُݨݨ دا فیصلہ کیتا۔ عطاء اللہ تارڑ آکھیا جو قائداعظم بیرسٹر ٻݨݨ کیتے “لنکنز ان” ونڃݨ دا فیصلہ تہوں کیتے جو تاریخ دان لکھدن جو لنکنز ان دی عمارت اچ قانون سازاں دی فہرست اچ حضور نبی کریم ﷺ دا ناں مبارک بطور “لا گیور” (قانون ݙیوݨ آلا) لکھیا ہویا ہا۔ قائداعظم 19 سال دی عمر اچ بیرسٹر ٻݨ ڳئے ہن اتے انہاں کوں برصغیر دا سب توں گھٹ عمر بیرسٹر تھیوݨ دا اعزاز حاصل اے۔ وفاقی وزیر اطلاعات آکھیا جو قائداعظم دی زندگی ساکوں اے سبق ݙیندی اے جو پکا عزم، یقین اتے لگاتار محنت نال ناممکن کوں ممکن ٻݨایا ونڃ سگدے۔ انہاں نوجواناں کوں زور ݙتا جو او قائد دا 1908ء دا “فیروز شاہ مہتہ کیس” ضرور پڑھن، جیندے اچ قائد کامیابی حاصل کر تے فیروز شاہ مہتہ کوں ممبئی کارپوریشن اچ بحال کروایا ہا۔ بھارت دے حوالے نال الیندے وفاقی وزیر آکھیا جو بھارت اچ ہک مسلمان خاتون دا حجاب چھکݨ دا واقعہ ‘ہندوتوا’ نظریئے دی انتہا پسندی دا ثبوت اے۔ اے ہندوتوا نظریہ اڄ قائداعظم دے “دو قومی نظریئے” کوں درست ثابت کریندا پئے، ہر گزردے ڈینہہ نال ساݙا ایں نظریے تے یقین ٻیا تکڑا تھیندا پئے اتے ایں نظریئے نال اڄ اساں آزاد فضا اچ ساہ ڳھندے پئے ہیں۔ انہاں آکھیا جو پاکستان ساڈی سُنڃاݨ اتے ماݨ اے۔ پاکستان “لا الہ الا اللہ” دے نعرے تے قائم تھیا ہا اتے اڄ ساڈے کولو جیہڑا کڄھ وی اے، او ایں وطن دی برکت نال اے۔