کوئی مسلم لیگ (ن) کوں خیبر پختونخوا بالخصوص پشاور اچ لاوارث نہ سمجھے، سیاست دا مطلب عوام وچال موجود رہݨا تے انہاں دے مسئلیں کوں سمجھݨ اے، عطاء اللہ تارڑ

پشاور۔23 ستمبر (اے پی پی) وفاقی وزیر اطلاعات و نشریات عطاء اللہ تارڑ آکھیے جو کوئی مسلم لیگ (ن) کوں خیبر پختونخوا بالخصوص پشاور اچ لاوارث نہ سمجھے، سیاست دا مطلب عوام وچال موجود رہݨا تے انہاں دے مسئلیں کوں سمجھݨ اے، مسلم لیگ (ن) دے قائد محمد نواز شریف دی خیبر پختونخوا دی تعمیر و ترقی دی روایت کوں وزیراعظم محمد شہباز شریف اڳوں ودھیندے پن، ھک پاسے خیبر پختونخوا حکومت اسلام آباد تے چڑھائی تے تباہی و بربادی دی سیاست کریندی پئی اے جݙاں جو ݙوجھے پاسے مسلم لیگ (ن) ریڈیو پاکستان کوں بحال، کارکناں نال رابطے تے صوبے اچ مثبت سیاست کوں ودھارا ݙیندی پئی اے، مسلم لیگ (ن) ٹک ٹاک تے سوشل میڈیا دی سیاست دی بجائے عوام وچ رہ تے مثبت سیاست کیتی اے۔ اے ڳالھ انہاں رکن صوبائی اسمبلی جلال خان دے دفتر دی افتتاحی تقریب توں خطاب کریندے آکھی۔ ایں موقع تے سابق گورنر پنجاب اقبال ظفر جھگڑا، وزیراعظم دے کوآرڈینیٹر اطلاعات و خیبر پختونخوا امور اختیار ولی خان، رکن صوبائی اسمبلی جلال خان، رکن صوبائی اسمبلی طارق خان، بلال خان، علی خادم یوسفزئی تے ٻئے پارٹی رہنما وی موجود ہن۔ تقریب توں خطاب کریندے وزیر اطلاعات آکھیا جو خیبر پختونخوا کوں غیور تے بہادر عوام دی سرزمین دے طور تے جاݨیا ویندے جیندے تے اساکوں ماݨ اے۔ وزیر اطلاعات آکھیا جو مسلم لیگ (ن) دے قائد میاں نواز شریف ہمیشہ خیبر پختونخوا دی تعمیر و ترقی دے حوالے نال روایات قائم کیتن۔ لاہور، اسلام آباد موٹروے بݨی اے تاں ایویں اسلام آباد، پشاور موٹروے وی مسلم لیگ (ن) دے دور اچ تعمیر تھئی۔ ٻئے صوبیں اچ ہسپتال، کالجز، جامعات تے بجلی دے منصوبے مکمل کیتے ڳئے تاں خیبر پختونخوا اچ وی ایہو جیھے ترقیاتی منصوبے شروع کیتے ڳئے۔ انہاں آکھیا جو میاں نواز شریف دی روایت کوں وزیراعظم محمد شہباز شریف اڳوں ودھیندے پئن، صوبے دے عوام دی ترقی کیتے تعلیم تے صحت دے شعبیں تے خصوصی توجہ ݙتی ویندی پئی اے۔ عطاء اللہ تارڑ آکھیا جو پنجاب اچ قائم کیتے ڳئے دانش سکولاں دی طرز تے ہݨ خیبر پختونخوا اچ وی دانش سکول قائم کیتے ویندے پئن۔ انہاں آکھیا جو پی ٹی آئی لوکاں اچ کوڑ کھنڈایا ، ذہن سازی کیتی تے انہاں کوں ھک کوڑے بیانیے دے پچھوں لاتا۔ انہاں آکھیا جو پی ٹی آئی جلال خان دے سیاسی جلال توں ݙردی اے۔ جلال خان جݙاں اسمبلی اچ جلال دے نال آندن تاں انہاں دا انداز نمایاں ہوندے۔ وزیر اطلاعات آکھیا جو خیبر پختونخوا اچ مسلم لیگ (ن) گزریل ساڈھے چوݙاں سال توں اپوزیشن اچ ہے ایں دے باوجود اساں ہمت نی ہری۔ مسلم لیگ (ن) دی قیادت تے کارکناں دی ہمت، حوصلے تے جذبے کوں سلام پیش کریندوں۔ مسلم لیگ (ن) دی قیادت قید و بند دیاں صعوبتاں برداشت کیتیاں تاں جو ہمت تے حوصلے دے نال اللہ تعالیٰ دے فضل نال ہمیشہ سر بلند رکھیا۔ انہاں آکھیا جو پی ٹی آئی دی حکومت خیبر پختونخوا دے عوام کوں انہاں دا حق ݙیوݨ تے مطلوبہ ترقیاتی کم کرݨ اچ ناکام رہی اے۔ صوبے اچ ترقی مسلم لیگ (ن) دے ادواراچ تھئی۔ پی ٹی آئی کیتے صوبے اچ ترقیاتی اقدامات کرݨ ممکن کائنی۔ وزیراطلاعات عطاء اللہ تارڑ آکھیا جو مسلم لیگ (ن) دے تنظیمی دفتر دا قیام ایں ڳالھ دا عکاس اے جو پارٹی اپوزیشن اچ رہندے ہوئے وی سیاسی تے تنظیمی سرگرمیاں جاری رکھی ہوئی اے۔ پارٹی دفتر آباد تھیسن تاں سیاسی سرگرمیاں کوں ودھارا ملسی، عوام اپݨے مسئلے بیان کر سڳسن تے کارکناں کوں ھک پلیٹ فارم میسر آسی جیندے نال خیبر پختونخوا اچ مسلم لیگ (ن) دی سیاسی سرگرمیاں مزید اڳوں ودھسن۔ وزیر اطلاعات آکھیا جو وزیراعظم محمد شہباز شریف کوں اپݨے دورہ خیبر پختونخوا دے حوالے نال بریف کیتے۔ وزیراعظم ایں ڳالھ تے خوش ہن جو ھک پاسے خیبر پختونخوا حکومت دی طرفوں اسلام آباد تے چڑھائی تے تباہی و بربادی دیاں کوششاں تھیندیاں پئن جݙاں جو ݙوجھے پاسے مسلم لیگ (ن) ریڈیو پاکستان دا افتتاح کیتا۔ وزیراعظم دی ہدایت تے کوہاٹ اچ کارکناں تے ساتھیاں نال ملاقاتاں کیتیاں، اکوڑہ خٹک دا دورہ کیتا۔ انہاں آکھیا جو ڄݙاں وی مسلم لیگ (ن) کوں خیبر پختونخوا اچ خدمت دا موقع ملیا، صوبے اچ نوجواناں کیتے کھیݙاں دے میدان بݨائے ویسن، نوجواناں کوں لیپ ٹاپ ݙتے ویسن، تعمیر و ترقی دا عمل اڳوں ودھایا ویسے، سکول، کالجز، ہسپتال تے یونیورسٹیاں بݨائیاں ویسن۔ وزیر اطلاعات آکھیا جو پی ٹی آئی گزریل چوݙاں سال دے دوران خیبر پختونخوا کوں ناقابلِ تلافی ضیان پڄائے۔ پاکستان تحریکِ انصاف دیاں حکومتاں صوبے اچ خاطر خواہ ترقیاتی کم نی کرسڳیاں۔ کوہاٹ تے ہنگو اچ صورتحال خراب اے جݙاں جو صوبائی حکومت دے ذمہ داران سوشل میڈیا تے ٹک ٹاک بݨاوݨ اچ مصروف ہن۔ مسلم لیگ (ن) ٹک ٹاک دی سیاست دے بجائے عوام وچال رہݨ کوں ترجیح ݙتی، میں پریس کلب دا دورہ کیتا، صحافیاں نال ملاقاتاں کیتیاں۔ اساں ہمیشہ عوام اچ موجود ریہے، شہدا دے گھراں اچ ڳئے تے زخمیاں نال ملاقاتاں کیتیاں۔ انہاں آکھیا جو سیاست دا مطلب عوام وچال رہݨ تے انہاں دے مسئلیں کوں سمجھݨ اے، محض سوشل میڈیا تے سرگرمیاں ݙکھاوݨ سیاست کائنی۔ مسلم لیگ (ن) خیبر پختونخوا اچ منفی یا صرف سوشل میڈیا دی سیاست نی کیتی بلکہ اپݨے لوکاں، بھراواں تے ساتھیاں وچال موجود رہ تے انہاں دیاں قربانیاں تے اوکھ دا ادراک کیتے۔ وزیر اطلاعات آکھیا جو کوئی مسلم لیگ (ن) کوں خیبر پختونخوا بالخصوص پشاور اچ لاوارث نہ سمجھے، مسلم لیگ (ن) دے کارکن تے رہنما عوام دے نال کھڑن، سیاست کرݨی اے تاں سیاسی میدان اچ کیتی ونڄے تے مقابلہ کیتا ونڄے۔ انہاں آکھیا جو خیبر پختونخوا تے پشاور دے عوام کوں ݙسایا ونڄے جو گزریل ساڈھے چوݙاں سولاں توں صوبے کیتے کیا اقدامات کیتے ڳئن۔ پی ٹی آئی جنہاں معاملات تے ماضی اچ تنقید کیتی بعد اچ انہاں ہی معاملات تے انہاں کوں یوٹرن گھنݨا پیا۔ وزیر اطلاعات آکھیا جو اڳوں وی خیبر پختونخوا آندے رہسوں، کارکناں تے ساتھیاں دے نال ٻہہ تے انہاں دے مسئلے تے ایشوز تے ڳالھ کریسوں۔ اتھاں وزارتِ اطلاعات و نشریات متعلق معاملات، ریڈیو پاکستان، پاکستان ٹیلی ویژن تے ایسوسی ایٹڈ پریس آف پاکستان کوں وی مزید فعال بݨاوݨ کیتے اقدامات کیتے ویسن۔ وزیر اطلاعات عطاء اللہ تارڑ آکھیا جو انجینئر امیر مقام طبیعت دی خرابی پاروں تقریب اچ شرکت نی کر سڳئے۔ انہاں دی صحت کیتے دعا کریندوں، خیبر پختونخوا اچ مسلم لیگ (ن) اچ ٻہوں صلاحیت تے قوت موجود اے، ایں ویلھے سٹیج تے موجود قیادت دا ہر فرد سو لوکاں دے برابر اے۔ وزیراطلاعات آکھیا جو کارکن اپݨے قیادت تے نمائندیں دے نال کھڑے تھیون تے انہاں دی حوصلہ افزائی کرن۔