تہران۔3 جولائی (اے پی پی) چیئرمین سینیٹ سید یوسف رضا گیلانی اعلیٰ سطح دے پاکستانی وفد دے رَلے تہران پڄ ڳئن جتھاں او آیت اللہ سید علی خامنہ ای دی نمازِ جنازہ تے تدفین اچ شرکت کریسن۔ گورنر خیبرپختونخوا فیصل کریم کنڈی وی ایں موقع تے چیئرمین سینیٹ دے نال ہن۔ سینیٹ سیکرٹریٹ دے مطابق تہران آمد تے ایرانی حکام تے پارلیمانی نمائندیاں پاکستانی وفد دا پرتپاک استقبال کیتا۔ دورۂ …
چیئرمین سینیٹ وفد دے رَلے تہران پڄ ڳئے، آیت اللہ سید علی خامنہ ای دی نمازِ جنازہ تے تدفین اچ شرکت کریسن
تہران۔3 جولائی (اے پی پی) چیئرمین سینیٹ سید یوسف رضا گیلانی اعلیٰ سطح دے پاکستانی وفد دے رَلے تہران پڄ ڳئن جتھاں او آیت اللہ سید علی خامنہ ای دی نمازِ جنازہ تے تدفین اچ شرکت کریسن۔ گورنر خیبرپختونخوا فیصل کریم کنڈی وی ایں موقع تے چیئرمین سینیٹ دے نال ہن۔ سینیٹ سیکرٹریٹ دے مطابق تہران آمد تے ایرانی حکام تے پارلیمانی نمائندیاں پاکستانی وفد دا پرتپاک استقبال کیتا۔ دورۂ تہران دے دوران چیئرمین سینیٹ دی ایرانی قیادت تے پارلیمانی حکام نال ملاقاتاں وی متوقع ہن، جنھاں اچ ݙوپاسہ تعلقات، پارلیمانی تعاون تے آپسی دلچسپی دے ٻئے معاملیاں تے ڳالھ تھیسی۔ ایں موقع تے پاکستان تے ایران دے وچال تاریخی، مذہبی، ثقافتی تے برادرانہ تعلقات کوں ٻیا مضبوط بݨاوݨ دے عزم دا وی اعادہ کیتا ویسے۔ تہران اچ میڈیا نال ڳالھ مہاڑ کریندیں ہوئیں چیئرمین سینیٹ سید یوسف رضا گیلانی ایرانی قیادت، پارلیمان تے عوام توں دلی تعزیت تے ہمدردی دا اظہار کیتا۔ انھاں آکھیا جو آیت اللہ سید علی خامنہ ای عالمِ اسلام دی ہک مؤثر، باوقار تے بااثر شخصیت ہن، جنھاں دی دینی، فکری تے سیاسی خدمات کوں ہمیشہ یاد رکھیا ویسے۔ چیئرمین سینیٹ آکھیا جو پاکستان تے ایران وچال دیرینہ برادرانہ تعلقات موجود ہن تے پاکستان ݙکھ دی ایں گھڑی اچ ایرانی عوام دے نال مکمل یکجہتی دا اظہار کریندے۔ انھاں ایں امید دا اظہار کیتا جو ݙوہیں ملکاں وچال آپسی تعاون تے پارلیمانی روابط آئندہ وی ٻئے ودھسن۔
