وزیراعظم محمد شہباز شریف دی صدارت ملکی برآمدات ودھاوݨ تے معاشی ترقی دی رفتار تیز کرݨ دے حوالے نال جائزہ اجلاس

اسلام آباد۔ 15 ستمبر (اے پی پی) وزیراعظم محمد شہباز شریف برآمدی صنعتاں کیتے جدید ٹیکنالوجی، تحقیق تے جدت کوں فروغ ݙیوݨ دی ہدایت کریندیں ہوئیں آکھیا جو پاکستانی مصنوعات دے معیار کوں عالمی معیار دے مطابق بݨاوݨ، کوالٹی اشورنس دے نظام کوں مؤثر بݨاوݨ تے بین الاقوامی معیار تے ضوابط تے مکمل عملدرآمد یقینی بݨاوݨ کیتے مؤثر اقدامات گھدے ونڄن، برآمدات اچ ویلیو ایڈیشن تے خصوصی توجہ ݙتی ونڄے تاں جو پاکستانی مصنوعات دی عالمی منڈی اچ قدر تے مسابقت ݙوہیں اچ اضافہ تھیوے۔ منگل کوں وزیراعظم آفس دے میڈیا ونگ توں جاری بیان دے مطابق وزیراعظم محمد شہباز شریف دی زیرِ صدارت ملکی برآمدات ودھاوݨ تے معاشی ترقی دی رفتار تیز کرݨ دے حوالے نال جائزہ اجلاس تھیا۔ اجلاس اچ نائب وزیراعظم تے وزیرِ خارجہ محمد اسحاق ڈار، وفاقی وزراء رانا تنویر حسین، جام کمال خان، ڈاکٹر مصدق مسعود ملک، احد خان چیمہ، محمد اورنگزیب، مشیر وزیراعظم ہارون اختر، وزیرِ مملکت برائے خزانہ بلال اظہر کیانی تے متعلقہ اداریاں دے اعلیٰ افسراں شرکت کیتی۔ اجلاس اچ برآمدات دے فروغ کیتے منظور شدہ سٹرٹیجک روڈ میپ تے عملدرآمد توں متعلق پیشرفت تے بریفنگ ݙتی ڳئی اتے نویں عالمی منڈیاں تائیں رسائی، برآمدی شعبیاں دی عالمی سطح تے مسابقتی صلاحیت بہتر بݨاوݨ، برآمدی شعبیاں اچ تنوع، مصنوعات دے معیار اچ بہتری تے کاروباری سہولت کاری دے حوالے نال مختلف تجاویز دا جائزہ گھدا ڳیا۔ وزیراعظم آکھیا جو برآمدات اچ اضافے کوں ملکی معاشی ترقی دی بنیاد بݨایا ونڄے تے روایتی شعبیاں دے نال نال ٻئے شعبیاں کوں وی عالمی منڈیاں اچ برآمدات کیتے تیار کیتا ونڄے، تجارت کوں متنوع بݨاوݨ کیتے زیادہ توں زیادہ شعبیاں تے صنعتاں کوں برآمدی سرگرمیاں اچ شامل کیتا ونڄے، پاکستانی مصنوعات دے معیار کوں عالمی معیار دے مطابق بݨاوݨ، کوالٹی اشورنس دے نظام کوں مؤثر بݨاوݨ تے بین الاقوامی معیار تے ضوابط تے مکمل عملدرآمد یقینی بݨاوݨ کیتے مؤثر اقدامات گھدے ونڄن۔ وزیراعظم آکھیا جو برآمدات اچ ویلیو ایڈیشن تے خصوصی توجہ ݙتی ونڄے تاں جو پاکستانی مصنوعات دی عالمی منڈی اچ قدر تے مسابقت ݙوہیں اچ اضافہ تھیوے۔ وزیراعظم ہدایت کیتی جو برآمدی صنعتاں کیتے جدید ٹیکنالوجی، تحقیق تے جدت کوں فروغ ݙتا ونڄے، ملکی معیشت کوں جدید تقاضیاں نال ہم آہنگ کرݨ کیتے ڈیجیٹلائزیشن تے جدید ٹیکنالوجی توں بھرپور چیدہ چاتا ونڄے، عالمی کمپنیاں کوں پاکستانی مصنوعات توں روشناس کرواوݨ کیتے ٹیکسپو، ہیلتھ انجینئرنگ اینڈ منرلز شو، فوڈ اینڈ ایگریکلچر تے ٻئے شعبیاں توں متعلق نمائشاں ملک دے مختلف شہراں اچ منعقد کیتیاں ویندیاں پئن، برآمدات اچ جدت کوں فروغ ݙیوݨ کیتے انٹیلیکچؤل پراپرٹی قوانین کوں دورِ حاضر دے تقاضیاں نال ہم آہنگ کرݨ تے کم جاری اے، ایکسپورٹ ڈویلپمنٹ فنڈ دی تنظیمِ نو دا عمل مکمل تھی ڳئے اتے ای ڈی ایف ولوں کاروباری برادری کیتے سہولت دے حوالے نال اقدامات کیتے ویندے پئن۔