پاکستان اچ گزریل چار پنج تباہ کن سیلاباں دے دوران تقریباً 7 ہزار افراد جاں بحق، 17 ہزار افراد زخمی یا مستقل معذور جڈانجو 4 کروڑ افراد بے گھر تھی ڳئن، مصدق ملک

اسلام آباد۔ 15 ستمبر (اے پی پی) وفاقی وزیرِ موسمیاتی تبدیلی تے ماحولیاتی ہم آہنگی ڈاکٹر مصدق ملک آکھیا جو پاکستان اچ گزریل چار پنج تباہ کن سیلاباں دے دوران تقریباً 7 ہزار افراد جاں بحق، 17 ہزار افراد زخمی یا مستقل معذور جڈانجو 4 کروڑ افراد بے گھر تھی ڳئن۔ اے ڳالھیں انہاں منگل کوں “پاکستان اچ ہجرت تے مائیگریشن گورننس دی بہتری اچ پارلیمنٹ دا کردار” دے موضوع تے پینل ڈسکشن توں خطاب کریندے ہوئیں کیتا۔ انہاں آکھیا جو اے محض 100، ایک ہزار یا 10 لکھ افراد دی نقل مکانی نئی بلکہ 4 کروڑ افراد دے بے گھر تھیوݨ دا معاملہ اے، ڄہیڑا یورپ دے کئی ملکاں دی آبادی توں ودھ تعداد اے۔ موسمیاتی تباہ کاریاں دے انسانی اثرات بیان کریندیں ہوئیں انہاں کراچی اچ حضرت عبداللہ شاہ غازی دے مزار دے گرد قیام پذیر اندرونِ سندھ توں نقل مکانی کرݨ آلے لوکاں دا ذکر کیتا اتے ہک ٻالڑی نال تھیوݨ آلی ملاقات دا حوالہ ݙتا۔ انہاں آکھیا جو ڄݙاں انہاں ٻالڑی کوں ݙسیا جو او سیاست کریندے ہن تاں اوں پچیھا جو سیاست کیا ہوندی اے، ڄیندے تے انہاں اونکوں سمجھاوݨ دی کوشش کیتی جو سیاست مستقبل ہوندی اے۔ ٻالڑی دے مستقبل دے بارے اچ پچھݨ تے انہاں آکھیا جو “مستقبل تم ہو”، جݙانجو ایں موقع تے انہاں کوں احساس تھیا جو اندرونِ سندھ توں سینکڑاں میل دا پندھ کر تے نقل مکانی کرݨ آلی ٻالڑی مزار دے تلے بیٹھی اے۔ مصدق ملک آکھیا جو اے ٻالڑی مائیگریشن دی انسانی شکل اے اتے ڄݙاں سیلاب یا کہیں قدرتی آفت کوں انسانی شکل اچ ݙٹھا ونڄے تاں متاثرہ لوکاں دی زندگیاں تے پووݨ آلے اثرات واضح تھیندن۔ انہاں بلوچستان دی ہک چھوٹے وستی اچ آوݨ آلے فلیش فلڈ دا ذکر کریندیں ہوئیں آکھیا جو ہک ٻال دی تصویر سامنے آئی ڄیندے ہتھ اچ ڳلی تے پھٹی ہوئی کتاب ہئی، اوں دا مکان وہہ ڳیا ہئی اتے او آپݨے والد آلے پاسے ݙیکھدا پیا ہئی، ڄیویں پوچھدا پیا ہووے جو ہݨ کیا تھیسی۔ مصدق ملک آکھیا جو ڄݙاں متاثرہ نوجواناں، انہاں دے والدین تے بزرگاں دیاں داستاناں، وہہ ونڄݨ آلے سکولاں، مسیتاں، گرجا گھراں تے ہزاراں سال دی تہذیب دے متاثر تھیوݨ کوں ہر بندے دی کہانی دے طور تے ݙٹھا ونڄے تاں موسمیاتی تباہ کاریاں تے نقل مکانی دے انسانی اثرات دی حقیقی شدت دا اندازہ تھیندے۔