پاکستان ڈیجیٹل معیشت کوں جامع معاشی تبدیلی دے ایجنڈے دے طور تے اڳوں ودھیندا پئے، پروفیسر احسن اقبال

ارمچی۔ 15 ستمبر (اے پی پی) وفاقی وزیر برائے منصوبہ بندی، ترقی تے خصوصی اقدامات پروفیسر احسن اقبال آکھیا جو پاکستان ڈیجیٹل معیشت کوں محض ٹیکنالوجی دے شعبے تئیں محدود نئی سمجھدا بلکہ اونکوں جامع معاشی تبدیلی دے ایجنڈے دے طور تے اڳوں ودھیندا پئے ڄیندے تحت برآمدات، پیداوار، جدت، سرمایہ کاری تے انسانی وسائل دی ترقی تے خصوصی توجہ ݙتی ویندی پئی اے۔ او منگل کوں چین دے شہر ارمچی اچ 2026 شنگھائی تعاون تنظیم (ایس سی او) ڈیجیٹل اکانومی فورم توں خطاب کریندے پئے ہن۔ انہاں آکھیا جو پاکستان اچ ڈیجیٹل صارفین دی تعداد 15 کروڑ توں ودھ ڳئی اے جڈانجو گزشتہ ݙو سالاں دے دوران ڈیٹا دے استعمال اچ تقریباً 25 فیصد اضافہ تھیا، ملک اچ فائبر کنکشنز تقریباً 30 لکھ توں ودھ تے 50 لکھ توں زائد تھی ڳئن اتے وائرڈ براڈ بینڈ کوں ہک کروڑ گھراں تئیں پڄاوݨ دا ہدف مقرر کیتا ڳئے۔ انہاں آکھیا جو پاکستان اچ موبائل انٹرنیٹ دے استعمال اچ صنفی فرق 35 فیصد توں گھٹ تھی تے صرف 8 فیصد رہ ڳئے جڈانجو تریمتیں دے موبائل انٹرنیٹ استعمال دی شرح 33 فیصد توں ودھ تے 45 فیصد تھی ڳئی اے۔ انہاں آکھیا جو ڈیجیٹل ترقی اچ تریمتیں دی بھرپور شمولیت ناگزیر اے کیونجو ایہجھیں ڈیجیٹل تبدیلی ڄہیڑی تریمتیں کوں پچھوں چھوڑ ݙیوے او نہ معاشی طور تے مؤثر تھی سڳدی اے تے نہ ای سماجی طور تے منصفانہ۔ پروفیسر احسن اقبال آکھیا جو پاکستان دی آئی ٹی تے آئی سی ٹی برآمدات گزشتہ مالی سال ریکارڈ 4.6 ارب ڈالر تئیں پڄ ڳئن، اگلا ہدف صرف سروسز دی برآمد نئی بلکہ ٹیکنالوجی مصنوعات، ڈیجیٹل پلیٹ فارمز تے ٹیکنالوجی تے مبنی صنعتاں دا فروغ اے۔ انہاں آکھیا جو اُڑان پاکستان دے تحت 2035 تئیں ہک کھرب ڈالر دی معیشت دا ہدف حاصل کرݨ کیتے برآمدات، پیداوار، جدت، سرمایہ کاری تے انسانی وسائل تے توجہ ݙتی ویندی پئی اے، اُڑان پاکستان دے پنج بنیادی ستوناں اچ شامل ای پاکستان ڈیجیٹل تبدیلی کوں معاشی ترقی دا اہم رکن قرار ݙیندے۔ وفاقی وزیر آکھیا جو پاکستان مصنوعی ذہانت، سائبر سکیورٹی، کلاؤڈ کمپیوٹنگ، سیمی کنڈکٹرز، جدید صنعت تے ابھردی ہوئی ٹیکنالوجیز اچ اپنی صلاحیتاں ودھیندا پئے، تحقیق، ہنرمندی، نئے کاروبار تے صنعت کوں باہم مربوط کرݨ کیتے ملک اچ ست مصنوعی ذہانت مراکز قائم کیتے ویندے پئن۔