پاکستان دا سعودی عرب دے دفاع دی حمایت دا عزم، حوثیاں دے خلاف فضائی حملیاں اچ پاکستانی لڑاکا طیاریاں دی شرکت بارے افواہیں کوڑیاں قرار

اسلام آباد۔9 اکتوبر (اے پی پی)پاکستان سعودی عرب دی خودمختاری، علاقائی سالمیت اتے سلامتی دا عزم دوہریندے حوثیاں دے خلاف فضائی حملیاں اچ پاکستانی لڑاکا طیاریاں دی شرکت دیاں افواہیں کوں کوڑیاں قرار ݙتے۔ پاکستان، امریکہ اتے ایران وچال کشیدگی گھٹ کرݨ اتے سیاسی مذاکرات دی حمایت کیتی اے، پاکستان بھارت توں بھارتی بارڈر سکیورٹی فورس دے اہلکاراں دے ہتھھوں ݙو پاکستانی شہریاں دی ہلاکت دے واقعے دی فوری، شفاف تے قابلِ اعتبار تحقیقات اتے ذمہ داران دے خلاف مناسب کارروائی دا مطالبہ کیتے۔ دفترِ خارجہ دے ترجمان سفیر سجاد حیدر خان ہفتہ وار پریس بریفنگ اچ آکھیے جو مکہ دفاعی اتحاد ہک دفاعی انتظام اے جیندا مقصد رکن ملکاں دی خودمختاری تے علاقائی سالمیت دا تحفظ تے انہاں دی اجتماعی دفاعی صلاحیت کوں مضبوط بݨاوݨ اے۔ مکہ دفاعی اتحاد دی سٹریٹجک سیاسی و دفاعی کمیٹی دے 5 اکتوبر کوں ریاض اچ مہنگامی اجلاس دا حوالہ ݙیندے انہاں آکھیا جو پاکستان، سعودی عرب اتے ترکیہ اپݨے اجتماعی دفاعی وعدیاں تے عملی طور تے عملدرآمد سانڳے اتفاق کیتے۔ ترجمان آکھیا جو کمیٹی سکیورٹی دی صورتحال تے سعودی عرب کوں درپیش خطرات دا جائزہ گھدا اتے مکہ مکرمہ اتے مدینہ منورہ کوں نشانہ بݨاوݨ دیاں کوششاں، شہراں، شہریاں اتے اقتصادی بنیادی ڈھانچے تے حملیاں دی مذمت کیتی۔ انہاں آکھیا جو ترائے ملکاں تیاریاں، فوجی انضمام تے سکیورٹی خطرات نال نپٹݨ کیتے اپݨی اجتماعی صلاحیت ودھاوݨ دے اقدامات دی منظوری ݙتی، جیندا مقصد رکن ملکاں کوں جارحیت توں بچاوݨ اے، پاکستانی افواج حوثی فورسز دے خلاف حملے کرݨ کیتے یمن اچ داخل نہ تھیسن ٻھل پاکستانی افواج سعودی سرزمین دے دفاع اتے ایںدی خودمختاری دے تحفظ کیتے استعمال کیتاں ونڄ سڳدن۔ انہاں آکھیا جو سعودی عرب اچ پاکستان دی وݙی تعداد اچ فوجی اہلکار اتے وسائل موجود ہن، اتحاد اپنے مینڈیٹ دے تحت خطرات دے جائزے تے آپریشنل ضروریات دا تعین کریسی۔ ترجمان حوثیاں دے خلاف فضائی حملیاں اچ پاکستانی لڑاکا طیاریاں دی شرکت دیاں افواہیں مسترد کریندے اینجھیاں خبراں کوں بے بنیاد قرار ݙتا۔ انہاں آکھیا جو پاکستان مسلسل کشیدگی اچ کمی، مذاکرات تے سفارت کاری دی حمایت کریندے اتے سعودی عرب دی خودمختاری دے تحفظ کیتے پرعزم اے۔  سجاد حیدر خان آکھیا جو اسلام آباد امریکہ اتے ایران دی کشیدگی گھٹ کرݨ اتے سیاسی مذاکرات دے عمل دی حمایت جاری رکھسی، ایںس انڳے ٻہوں پیشرفت تھئی اے، اسلام آباد مفاہمتی یادداشت بدستور برقرار اے اتے پاکستان ضرورت پووݨ تے مذاکرات نال حل تئیں پڄݨ کیتے سہولت کاری جاری رکھݨ کیتے تیار اے۔ ترجمان آکھیا جو پاکستان 5 اکتوبر کوں ماسکو اچ افغانستان بارے ماسکو فارمیٹ مشاورت دے اٹھویں اجلاس اچ افغان سرزمین توں جنم گھنݨ والی دہشت گردی دے حوالے نال اپݨے تحفظات پیش کیتن، افغانستان توں شروع تھیوݨ والی دہشتگردی ہمسایہ ملکاں بالخصوص پاکستان کیتے سکیورٹی دا ہک سنگین خطرہ اے۔ ترجمان جموں و کشمیر بارے پاکستان دا موقف دوہرایا۔ انہاں اقوامِ متحدہ دے سیکرٹری جنرل انتونیو گوتریس دے حالیہ دورۂ پاکستان اچ اقوامِ متحدہ دے ملٹری آبزرور گروپ برائے بھارت و پاکستان دے کردار بارے بیان دا خیرمقدم کیتا۔ موسمیاتی تبدیلی بارے ترجمان آکھیا جو پاکستان موسمیاتی چیلنجاں نال نمٹݨ کیتے اقدامات کریندا پئے۔ ترجمان ݙسایا جو پاکستان 2 اکتوبر کوں بین الاقوامی سرحد دے نال بیدیاں سیکٹر اچ بھارتی بارڈر سکیورٹی فورس دے اہلکاراں دے ہتھوں ݙو پاکستانی شہریاں دی ہلاکت تے بھارت توں سخت احتجاج کیتے۔ پاکستان ایں واقعے دی فوری، شفاف تے قابلِ اعتبار تحقیقات تے ذمہ دار افراد دے خلاف مناسب کارروائی دا مطالبہ کیتے۔