وزیراعظم فیول سبسڈی سکیم: فیدہ چاوݨ آلیاں دی تعداد ہک کروڑ توں ودھ ڳئی، وفاق صوبیاں دا تعاون بہترین ٹیم ورک دا نتیجہ اے: وزیراعظم شہباز شریف، شزا فاطمہ کوں تمغہ ݙیوݨ دا اعلان

اسلام آباد۔9 اکتوبر(اے پی پی)وزیراعظم محمد شہباز شریف ’’وزیراعظم فیول سبسڈی سکیم‘‘ اچ وفاق نال صوبیاں دے تعاون دی تعریف کریندے آکھیے جو وزیراعظم فیول سبسڈی سکیم: فیدہ چاوݨ آلیاں دی تعداد ہک کروڑ توں ودھ ڳئی، وفاق صوبیاں دا تعاون بہترین ٹیم ورک دا نتیجہ اے۔ انہاں اے ڳالھ وزیراعظم فیول سبسڈی سکیم اچ ڈیجیٹل طریقۂ کار نال شفاف انداز اچ ہک کروڑ توں ودھ لوکاں کوں براہِ راست سبسڈی ݙیوݨ تے تے وزراء و افسران دے اعزاز اچ ݙتے ڳئے کھاوݨے اتے خصوصی تقریب نال الیندے آکھی۔ انہاں آکھیا جو پٹرول سبسڈی ݙیوݨ ہک وݙا اقدام اے، اللہ دا شکر اے جو ساݙیاں کوششاں رنگ لائے، متعلقہ وزارتاں اتے صوبیاں دے تعاون دے بغیر اے ممکن نا ہا اتے سکیم توں فیدہ چاوݨ آلیاں دی تعداد 13 لکھ توں ودھ تے ہݨ ہک کروڑ توں وی ٹپ ڳئی اے۔ انہاں آکھیا جو اے براہِ راست وی تے بالواسطہ وی فیدہ اے، ڄیکر خاندان توں ہٹ تے ݙیکھوں تاں ایندے نال 5 کروڑ لوکاں براہِ راست اتے بالواسطہ فائدہ چاتے، ہݨ تئیں ہک کروڑ اٹھ لکھ اسی ہزار توں ودھ شہریاں رجسٹریشن کروائی اے، ہک کروڑ ہک لکھ اٹھانوے ہزار واؤچرز جاری کیتے ڳئن، کل ݙو کروڑ ستر لکھ ٹوکن جاری تھئن۔ تقریباً 96 فیصد موٹر سائیکل سواراں ایں سکیم توں فائدہ حاصل کیتے، ایں سانڳے سارے متعلقہ لوکاں، اداریاں اتے سوبیاں کوں خراج تحسین پیش کرینداں ڄئیں سکیم دی کامیابی اچ کردار ادا کیتے، اے سکیم ان شاء اللہ چلدی رہسی، اساں 75 ارب روپے دے فنڈز رکھیے ہوئن۔ ایں موقع تے وزیراعظم وفاقی وزیر برائے انفارمیشن ٹیکنالوجی و ٹیلی کمیونیکیشن شزا فاطمہ کوں بہترین خدمات تے 23 مارچ کوں تمغہ ݙیوݨ دا اعلان کیتا اتے ٻیاں محکمیاں دے حکام کوں شیلڈز ݙتیاں ویسن۔