وزیراعظم شہباز شریف نال ذیابیطس دے بین الاقوامی تے قومی طبی ماہرین دی ملاقات، مرض دی روک تھام کیتے جامع حکمتِ عملی ٻݨاوݨ دی ہدایت

اسلام آباد۔10 اکتوبر (اے پی پی) وزیراعظم محمد شہباز شریف ذیابیطس دی روک تھام کیتے جامع تے مؤثر حکمتِ عملی ٻݨاوݨ دی ہدایت کریندیں ہوئیں آکھیا جو ذیابیطس جیہڑے ودھدے ہوئے صحت دے چیلنج نال نپٹݨ کیتے علاج دے نال نال بیماری دی روک تھام تے خصوصی توجہ ݙیوݨ وقت دی اہم ضرورت اے، متوازن غذا، باقاعدہ جسمانی سرگرمی تے صحت مند معمولاتِ زندگی اپناوݨ دے حوالے نال عوامی آگاہی کوں قومی سطح تے فروغ ݙتا ون٘ڄے۔ ہفتے کوں وزیراعظم آفس دے میڈیا ونگ توں جاری بیان دے مطابق وزیراعظم محمد شہباز شریف نال ذیابیطس دے بین الاقوامی تے قومی طبی ماہرین دے وفد ملاقات کیتی۔ وفد اچ صدر بین الاقوامی اینڈوکرائنولوجی سوسائٹی ڈاکٹر سید عباس رضا دی قیادت اچ مختلف ملکاں دے طبی ماہرین شامل ہن، ملاقات اچ وفاقی وزراء احد خان چیمہ، سید مصطفیٰ کمال، وزیرِ مملکت برائے صحت ڈاکٹر ملک مختار برتھ تے متعلقہ اداریاں دے اعلیٰ افسران وی موجود ہن۔ وزیراعظم آکھیا جو نوجواناں، بالخصوص کالجاں تے یونیورسٹیاں دے طالب علماں اچ صحت مند طرزِ زندگی کوں فروغ ݙیوݨ کیتے مؤثر اقدامات کیتے ون٘ڄن، ٹیلی ویژن، ریڈیو، ڈیجیٹل پلیٹ فارمز تے ٻئے ذرائع ابلاغ دے ذریعے ذیابیطس توں بچاؤ، بروقت تشخیص تے صحت مند طرزِ زندگی نال متعلق معلومات عام کیتیاں ون٘ڄن۔ وزیراعظم آکھیا جو ذیابیطس دی روک تھام کیتے قومی ترجیحات دے مطابق واضح پالیسی تے قابلِ عمل منصوبہ بندی ضروری اے، ایں بارے متعلقہ ادارے تحقیق، آگاہی تے احتیاطی تدابیر دے حوالے نال مربوط حکمتِ عملی ٻݨاون۔ وزیراعظم آکھیا جو ذیابیطس دے ودھدے ہوئے چیلنج نال مؤثر انداز اچ نبڑݨ کیتے علاقائی تے بین الاقوامی تعاون کوں فروغ ݙیوݨ ضروری اے، بین الاقوامی تجربات، تحقیق تے بہترین عملی طریقیاں توں استفادہ کریندے ہوئیں ملک اچ بیماری دی روک تھام دے اقدامات کوں ٻیا مؤثر بݨایا ون٘ڄے۔ طبی ماہرین دا وفد پاکستان اچ اینڈوکرائنولوجی سیمینار اچ شرکت کیتے موجود اے، وفد دے شرکاء ذیابیطس تے ٻیاں بیماریاں دی روک تھام دے حوالے نال اڄوکے اقدامات تے پالیسی دے نفاذ دی تعریف کیتی، وفد دے شرکاء پاکستان اچ ذیابیطس دی روک تھام تے عوام کیتے آگاہی مہم اچ تعاون دے عزم دا اظہار کیتا۔ وفد دے ارکان آکھیا جو پاکستانی طبی ماہرین پوری دنیا اچ ذیابیطس تے ٻیاں بیماریاں دے علاج تے روک تھام کیتے انتہائی اہم خدمات سر انجام ݙیندے پئن۔