وزیراعظم دی طرفوں ڈی جی خان ایئرپورٹ کوں بین الاقوامی پروازاں کیتے اپ گریڈ کرݨ دے اعلان تے کم شروع تھی ڳئے، وفاقی وزیر سردار اویس لغاری

اسلام آباد۔19اکتوبر(اے پی پی) وفاقی وزیرتوانائی (پاور ڈویژن) سردار اویس احمد خان لغاری آکھیے جو وزیراعظم محمد شہباز شریف دی طرفوں ڈی جی خان ایئرپورٹ کوں بین الاقوامی پروازاں کیتے اپ گریڈ کرݨ دے اعلان تے کم شروع تھی چکیے، ساڈھے پنج ارب روپے دی لاڳت نال ایئرپورٹ دا توسیعی منصوبہ جنوری 2028ء اچ مکمل کیتا ویسے۔ڈی جی خان ایئرپورٹ دے توسیعی منصوبے دے جائزے دے موقع تے ڳالھ کریندے وفاقی وزیر آکھیا جو سول ایوی ایشن اتھارٹی دیاں ٹیماں منصوبے تے کم کریندیاں پئن تے ایئرپورٹ دے رن وے دی توسیع سودھے مختلف امور تے پیشرفت جاری اے۔ ایں موقع تے وفاقی وزیر رن وے دی توسیع دے کم دا معائنہ کیتا تے منصوبے تے جاری پیشرفت دا جائزہ ڳھدا۔انہاں آکھیا جو ڈی جی خان ایئرپورٹ کوں بین الاقوامی پروازاں کیتے اپ گریڈ کرݨ نال علاقے دے عوام کوں سفری سہولتاں میسرآسن تے جنوبی پنجاب اچ ترقی و خوشحالی دے نویں موقع پیدا تھیسن۔ وفاقی وزیر آکھیا جو وزیراعظم پاکستان ڈی جی خان دی ترقی کیتے چار اہم منصوبیں دا اعلان کیتا ہئی جنہاں اچ ایئرپورٹ دی توسیع، کینسر ہسپتال دا قیام، سیوریج دا طویل المدتی منصوبہ تے سڑکاں دی توسیع و کشادگی شامل ہن، سیوریج دا منصوبہ آندے 50 سال دیاں ضرورتاں کوں سامݨے رکھیندے تیار کیتا ویندا پئے جݙاں جو سڑکاں دی بہتری تے کشادگی نال شہریاں کوں آونڄ اچ سوکھ تھیسی ،انہاں منصوبیں دی تکمیل نال ڈی جی خان اچ بنیادی سہولتاں بہتر تھیسن تے علاقے دی ترقی کوں ودھاراملسی۔ملک اچ بجلی دی لوڈشیڈنگ تے وفاقی وزیر توانائی آکھیا جو بجلی دی لوڈشیڈنگ طے شدہ منصوبے موجب کیتی ویندی پئی اے۔ انہاں آکھیا جو ایران امریکہ جنگ پاروں گیس دی فراہمی تے دستیابی متعلق پیدا تھیوݨ آلی اوکھ بجلی دی پیداواری لاگت تے اثر انداز تھیندیاں پئن جئیں پاروں مہانگے ذرائع توں بجلی دی پیداوار دے مسئلے درپیش ہن۔ انہاں آکھیا جو حکومت بجلی چوری تے لائن لاسز تے قابو پاوݨ کیتے جدید ٹیکنالوجی متعارف کرویندی پئی اے، ایں سلسلے اچ ملک بھراچ ٹرانسفارمرز تے (اے پی ایم ایس) نصب کیتا ویندا پئے جیندا مقصد بجلی چوری دی نشاندہی کرتے متعلقہ علاقیں اچ مؤثر کارروائی کرݨا اے۔سردار اویس احمد خان لغاری واضح کیتا جو 30 فیصد یا ایں توں ودھ ضیان آلے فیڈرز تے لوڈشیڈنگ دا سلسلہ جاری رہسی تے بجلی چوری کرݨ آلیں یا بجلی دے ٻل نہ بھرݨ آلیں نال کوئی رعایت نہ ورتی ویسے۔ انہاں آکھیا جو حکومت بجلی دے نظام اچ بہتری، ضیان اچ گھٹکی تے صارفین کوں بہتر سہولتاں ݙیوݨ کیتے اقدامات کریندی پئی اے۔ایندے توں پہلے پراجیکٹ ڈائریکٹر سول ایوی ایشن اتھارٹی وفاقی وزیر کوں ایئرپورٹ دے توسیعی منصوبے تے بریفنگ ݙتی تے انہاں کوں شیلڈ وی پیش کیتی۔ وفاقی وزیر ایئرپورٹ توسیعی منصوبے تے شجرکاری مہم دے سلسلے اچ ٻوٹا وی رادھا تے دعا کیتی۔ ایں موقع تے رکنِ قومی اسمبلی سردار عمار لغاری، رکنِ صوبائی اسمبلی علی یوسف لغاری، سابق ممبرانِ صوبائی اسمبلی سردار یوسف لغاری تے علیم شاہ وی موجود ہن۔