وزیرِ خارجہ اسحاق ڈار ایس سی او سربراہانِ حکومت دی کونسل دے اجلاس اچ پاکستانی وفد دی قیادت کیتے دوشنبے پڄ ڳئن

اسلام آباد۔19 اکتوبر(اے پی پی) نائب وزیراعظم و وزیرِ خارجہ سینیٹر محمد اسحاق ڈار شنگھائی تعاون تنظیم (ایس سی او) دے سربراہانِ حکومت دی کونسل (سی ایچ جی) دے اجلاس اچ پاکستانی وفد دی قیادت کیتے تاجکستان دے دارالحکومت دوشنبے پڄ ڳئن۔ترجمان دفترِ خارجہ موجب دوشنبے پڄݨ تے تاجکستان دے وزیرِ توانائی و آبی وسائل تے پاکستان-تاجکستان مشترکہ کمیشن دے شریک چیئرمین دلیر جمعہ، تاجکستان اچ پاکستان دے سفیر عرفان احمد، ایس سی او کیتے پاکستان دے قومی رابطہ کار خلیل ہاشمی تے تاجک حکومت دے سینئر حکام نائب وزیراعظم دا استقبال کیتا۔ایس سی او دے سربراہانِ حکومت دی کونسل دا اجلاس 19 تے 20 اکتوبر 2026ء کوں منعقد تھیندا پئے۔ نائب وزیراعظم تے وزیرِخارجہ محمد اسحاق ڈار تاجکستان دے وزیراعظم قاہر رسول زادہ دی دعوت تے اے دورہ کریندے پئن۔ ایس سی او دے سربراہانِ حکومت دی کونسل دے اجلاس اچ بیلاروس، چین، قازقستان، کرغزستان، روس، تاجکستان تے ازبکستان دے وزرائے اعظم، ایران دے نائب صدر تے بھارت دے وزیرِ خارجہ اپݨے اپݨے ملکاں دی نمائندگی کریسن۔سی ایچ جی شنگھائی تعاون تنظیم دا ݙوجھا اعلیٰ ترین فیصلہ ساز ادارہ اے جیڑھا جو تنظیم دے اقتصادی، مالیاتی، تجارت، رابطہ کاری، کاروبار، سماجی و اقتصادی تعاون تے بجٹ متعلق امور اچ رہنمائی ݙیندے۔ سی ایچ جی ہک مشترکہ اعلامیہ، بیانات تے اہم فیصلیں دی وی منظوری ݙیسی۔دورے دے دوران نائب وزیراعظم و وزیرِ خارجہ تاجکستان دے صدر تے وزیراعظم نال وی ملاقات کریسن، جݙاں جو سی ایچ جی اجلاس دے موقع تے شنگھائی تعاون تنظیم دے رکن ملکاں دے اپݨے ہم منصباں دے نال ݙوطرفہ ملاقاتاں وی کریسن۔