جامعات کوں تحقیق،اختراع تے ٹیکنالوجی دے ودھارے دے ذریعے قومی معیشت دی ترقی دا محرک بݨݨا ہوسی، احسن اقبال

اسلام آباد۔19 اکتوبر(اے پی پی) وفاقی وزیرمنصوبہ بندی، ترقی و خصوصی اقدامات احسن اقبال آکھیے جو جامعات کوں تحقیق، اختراع تے ٹیکنالوجی دے ودھارے دے ذریعے قومی معیشت دی ترقی دا محرک بݨݨا ہوسی۔نیشنل یونیورسٹی آف سائنسز اینڈ ٹیکنالوجی (نسٹ) دے ماسٹرز کانووکیشن 2026ء دی منعقد تھیوݨ آلی تقریب نال خطاب کریندے انہاں فارغ التحصیل تھیوݨ آلے طلبہ تے زور ݙتا جو او پاکستان دی معاشی تعمیر اچ اپݨا کردار ادا کرن۔ احسن اقبال آکھیا جو پاکستان برآمدات، فی کس آمدݨ تے ٹیکنالوجی دے سفر اچ دنیا توں پچھوں اے جݙاں جو برآمدی منڈیاں تئیں رسائی، ٹیکنالوجی دے استعمال تے ملکی معیشت دے ڈھانچے متعلق چیلنجز وی درپیش ہن۔ انہاں موجب برآمدات اچ ودھارا حکومتی پروگرام ’’اڑان پاکستان‘‘ دی اولین ترجیح اے تے جامعات کوں ایں سلسلے اچ قائدانہ کردار اپناوݨ دی لوڑھ اے۔وفاقی وزیر آکھیا جو دنیا تکھے بدلدل پئی اے تے غیر یقینی صورتحال دے دور اچ داخل تھیندی پئی اے جتھاں مصنوعی ذہانت روایتی نظاماں کوں بدلیندی پئی اے تے سیاسی و معاشی استحکام دی صورتحال وی تبدیل تھیندی پئی اے۔ ایجھے حالات اچ اصلاحات کیتے پرامن تے مستحکم ماحول ضروری اے۔ انہاں دا آکھݨ ہئی جو پاکستان کول اپݨی ترقی دی سمت بدلݨ کیتے وسائل موجود ہن جیندے کیتے نوجوان اے کلیدی کردار ادا کرسڳدن۔ انہاں جامعات تے وی زور ݙتا جو او حکومت کوں اہم قومی مسئلیں دے حل کیتے قابلِ عمل تجویزاں ݙیون۔ انہاں فارغ التحصیل طلبہ کوں زندگی دی ناکامیاں توں سکھݨ تے اپݨے اپݨے شعبیں اچ ملک و قوم دی فلاح کیتے کم کرݨ دی تلقین کیتی۔کانووکیشن دی تقریب دا انعقاد جامعہ دے مرکزی کیمپس اچ تھیا جیندے اچ 66 پی ایچ ڈی سکالرز کوں ڈگریاں ݙتیاں ڳئن جݙاں جو 26 انڈرگریجویٹ طلبہ کوں صدارتی طلائی تمغے جݙاں جو 28 کوں چانسلر دے نقرئی تمغیں نال نوازیا ڳیا۔ نسٹ دا ماسٹرز کانووکیشن 2026ء جامعہ دے کانووکیشن ویک 2026ء دے آغاز دا حصہ اے۔ایں موقع تے ریکٹر نسٹ ڈاکٹر محمد زاہد لطیف فارغ التحصیل طلبہ، انہاں دے والدین تے استاداں کوں مبارخ ݙتی تے آکھیا جو گریجویشن طلبہ دی زندگی اچ ہک نویں مرحلے دا آغاز اے جیندے اچ انہاں کوں اوکھے چیلنجز دا سامݨا کرݨا ہوسی۔ انہاں تعلیمی سفر اچ والدین دی قربانیاں دی وی تعریف کیتی تے آکھیا جو نسٹ طلبہ کوں علمی قابلیت دے نال معاشرے دی خدمت کیتے وی تیار کریندی پئی اے۔