وزیراعظم عمران خان 24 ستمبر کوں اقوام متحدہ دی جنرل اسمبلی نال ویڈیو لنک تے خطاب کریسن

اسلام آباد۔20ستمبر(اے پی پی)وزیراعظم جنرل اسمبلی دے 76 ویں اجلاس نال 24 ستمبر کوں آن لائن خطاب کریسن اتے او اجلاس اچ مقبوضہ کشمیر صورتحال، افغانستان دے اڄوکے حالات، بھارت ولوں کھنݙاواݨ آلیاں جعلی خبراں دو ڄڳ دی توجہ ݙویسن۔ اقوام متحدہ اچ پاکستانی مندوب منیر اکرم آکھیے جو عمران خان اپݨے پالیسی بیان اچ اہم عالمی اقتصادی و سیاسی امور تے پاکستان دا موقف پیش کریسن۔ پاکستان اجلاس اچ بھارت دے غیرقانونی زیر قبضہ جموں و کشمیر اچ انسانی حقوق دی خلاف ورزیاں دو توجہ ݙویسی۔ اجلاس اچ وزیر اعظم عمران خان افغانستان دے استحکام کیتے تجویزاں وی ݙیسن۔ ایں سال اقوام متحدہ دی جنرل اسمبلی دے اجلاس اچ موضوع کورونا وائرس توں بحالی، پائیدار تعمیرنو، لوکاں دے حقوق دا احترام اتے موسمیاتی تبدیلی اے۔