اقوام متحدہ۔24ستمبر (اے پی پی) وزیراعظم عمران خان دنیا کوں افغانستان اچ منڈلیندے ہک وݙے انسانی بحرانی بارے خبردار کریندیں ہوئیں آکھیا جو غیر مستحکم، افراتفری دا شکار افغانستان ہک واری ولا بین الاقوامی دہشت گرداں کیتے محفوظ پناہ ڳاہ ٻݨ سڳدے، افغانستان دی عوام کیتے اڄوکی حکومت کوں مستحکم کیتا ونڄے۔ایں کیتے ہکو رستہ اڳوں ودھݨ دا اے جو افغانستان دے لوکاں کیتے اڄوکی حکومت کوں مستحکم کیتا ونڄے۔ ترقی پذیر ملکاں اچ کرپٹ حکمران اشرافیہ دی لٹ مار پاروں امیر اتے غریب ملکاں وچال فرق خطرناک حد تئیں ودھدا ویندے۔ خدشہ اے جو غریبی دے سمندر اچوں کجھ امیر جذائر وی موسمیاتی تبدیلی جیھے عالمی آفت دی شکل اختیار کر سڳدن۔ اسلاموفوبیا دے خطرناک رجحان کوں رل تے روکݨ دی لوڑھ اے، ایں ویلھے اسلاموفوبیا دی بدترین اتے سرایت پذیر شکل دا بھارت تے راج اے، اسلاموفوبیا اچ ودھارے کوں روکݨ بارے عالمی مکالمہ کیتا ونڄے، مقبوضہ جموں تے کشمیر اچ بھارت دے گھنائونے اقدامات جنگی جرائم اتے انسانیت دے خلاف جرائم دے مترادف ہن، جنوبی ایشیا اچ پائیدار امن اقوام متحدہ دی سلامتی کونسل دی متعلقہ قرارداداں اتے کشمیری عوام دی خواہشات دے مطابق جموں تے کشمیر دے تنازعہ دے حل تے منحصر اے۔ کورونا وبا اقتصادی مندی اتے موسمیاتی تبدیلی دی سہ جہتی بحران نال نبڑݨ کیتے ہک جامع حکمت عملی دی لوڑھ اے۔ اے ڳالھیں انہاں جمعے دی رات اقوام متحدہ دی جنرل اسمبلی دے 76ویں اجلاس نال ویڈیو خطاب کیتا۔ وزیراعظم عمران خان آپݨے خطاب اچ افغانستان دی صورتحال ، تنازعہ کشمیر، اسلامو فوبیا، بھارت ولوں انسانی حقوق دی وݙے پیمانے تے خلاف ورزیاں، موسمیاتی تبدیلی دے چیلنجز، کوویڈ وبا، کرپشن دے اثرات سودھے کئی موضوعات تے تفصیلی ڳالھ مہاڑ کیتی۔ وزیراعظم افغانستان دی اڄوکی صورتحال تے ڳالھ کریندیں ہوئیں افغانستان دی اڄوکی صورتحال کیتے کہیں پاروں امریکہ اچ سیاستداناں اتے یورپ دے کجھ سیاستداناں پاکستان کوں انہاں واقعات کیتے الزام لاتے۔ انہاں آکھیا جو ایں پلیٹ فارم توں میں انہاں ساریاں کوں ݙساوݨ چاہنداں جو نائن الیون دے بعد دہشت گردی دے خلاف امریکی جنگ اچ جئیں ویلھے اساں شامل تھیے تاں افغانستان دے علاوہ جئیں ملک ساریاں توں ودھ نقصان چاتے او پاکستان اے۔ وزیراعظم دہشت گردی دے خلاف جنگ اچ پاکستان دے جانی تے مالی ضیان دا ذکر کریندیں ہوئیں آکھیا جو اسی ہزار پاکستانی جاں بحق تھین، اساݙی معیشت کوں 150 ارب ڈالر دا نقصان تھیے۔ 35 لکھ پاکستانی عارضی طور بے گھر تھین اتے اینویں کیوں تھیا؟ 1980دے عشرے اچ پاکستان افغانستان تے قبضے دے خلاف لڑائی اچ فرنٹ لائن سٹیٹ ہئی۔ پاکستان اتے امریکہ افغانستان دی آزادی کیتے لڑݨ کیتے مجاہدین گروپ کوں تربیت ݙتی۔ انہاں مجاہدین گروپاں اچ القاعدہ اتے پوری دنیا دے گروپس شامل ہن۔ اومجاہدین ہن۔ افغان مجاہدین انہاں کوں ہیرو آکھیا ڳیا۔ انہاں یاد ݙوایا جو صدر رونالڈ ریگن 1983 ء اچ انہاں کو وائٹ ہاس اچ سݙیا ہئی اتے ہک خٻر دے مطابق انہاں انہاں دا امریکہ دے بانیان نال تقابل کیتا ہئی۔ او ہیروز ہن۔ وزیراعظم آکھیا جو نائن الیون دے فوری بعد امریکہ کوں ہک واری ولا پاکستان دی لوڑھ تھئی کیونجو ہݨ امریکہ دی قیادت اچ اتحاد افغانستان تے حملہ آور ہئی اتے اے پاکستان دی لاجسٹک سپورٹ دے بغیر ممکن کائنا ہئی۔ ایں دے بعد کیا تھیا؟ او مجاہدین جنہاں کوں اساں تربیت ݙتی ہئی غیر ملکی قبضے دے خلافجنگ اچ ہک مقدس فریضہ، مقدس جنگ یا جہاد اے، اساݙے خلاف تھی ڳئے۔ اساݙے خلاف اعلان جنگ کر ݙتا۔ انہاں آکھیا جو اگر دنیا دی ساریاں توں منظم فوج اتے دنیا دی بہترین خفیہ ایجنسیاں اچوں ہک خفیہ ایجنسی نہ ہوندی تاں میݙے خیال اچ پاکستان ٻہوں تلے ویندا۔ انہاں آکھیا جو ہݨ پوری عالمی برادری کوں سوچݨا چاہیدے جو اڳوں ودھݨ دا رستہ کیا اے۔ انہاں آکھیا جو غیر مستحکم، افراتفری دا شکار افغانستان ہک واری ولا بین الاقوامی دہشت گرداں کیتے محفوظ پناہ ڳاہ ٻݨ سڳدے، افغانستان دی عوام کیتے اڄوکی حکومت کوں مستحکم کیتا ونڄے۔وزیراعظم بھارت دے غیر قانونی زیر غیر قبضہ مقبوضہ جموں و کشمیر دی صورتحال دا ذکر کریندیں ہوئیں آکھیا جو بھارت پنج اگست 2019 توں مقبوضہ کشمیر اچ کئی غیر قانونی اتے پک پاسہ اقدامات کیتن۔ اوں نو لکھ قابض فوج نال دہشت دی فضا ٻݨا رکھی اے، کشمیریاں دی سینئر قیادت کوں پابند سلاسل رکھیے، میڈیا اتے انٹرنیٹ تے سخت پابندیاں لاتی ڳئن۔ پر امن احتجاج کوں پرتشدد طریقے نال دبایا ڳئے۔ 13 ہزار نینگر کشمیریاں کوں اغوا کیتا ڳئے اتے انہاں اچوں سینکڑاں کوں تشدد دا نشانہ ٻݨایا ڳئے۔ جعلی مقابلیاں اچ سینکڑاں بے گناہ کشمیراں کوں ماورائے عدالت قتل کیتا ڳئے اتے پورے پورے محلاں اتے دیہات کوں تباہ کر تے لوکاں کوں اجتماعی سزائیں ݙتی ڳئن۔ وزیراعظم جنرل اسمبلی کوں ݙسیا جو اساں مقبوضہ جموں تے کشمیر اچ بھارتی سکیورٹی فورسز ولوں انسانی حقوق دی سنگین اتے منظم خلاف ورزیاں بارے ہک تفصیلی ڈوزیئر جاری کیتے۔ قرارداداں اچ نشابر طور بیان کیتا ڳئے جو متنازعہ علاقے دی حتمی حیثیت دا فیصلہ اقوام متحدہ دے تحت آزادانہ اتے غیر جانبدارانہ استصواب رائے نال اوندے لوکاں کوں کرݨا چاہیدے۔ انہاں آکھیا جو بھارتی بربریت دی اڄوکی مثال عظٰم کشمیری رہنما سید علی گیلانی دے جسدخاکی کوں انہاں دے ٹبر توں زبردستی کھسݨ اتے انہاں دی وصیت اتے اسلامی روایت دے مطابق نماز جنازہ پڑھݨ اتے تدفین توں محروم کرݨ اے۔ عمران خان آکھیا جو کہیں قانونی یا اخلاقی پابندی توں عاری اے عمل انسانی شائستگی دی بنیادی اقدار دے منافی اے۔ وزیراعظم آکھیا جو پاکستان بھارت نال وی اتے سارے ہمسایہ ملکاں وانڳوں امن چاہندے۔ پر جنوبی ایشیا اچ پائیدار امن دا انحصار اقوام متحدہ دی سلامتی کونسل دی قرارداداں اتے کشمیری عوام دی خواہشات دے مطابق جموں تے کشمیر دے تنازعہ دے حل تے اے۔ انہاں آکھیا جو پاکستان اتے بھارت وچال ہک ٻیا تصادم کوں روکݨ ٻہوں ضروری اے۔ وزیراعظم اسلامو فوبیا دے خطرناک رجحان دا ذکر کریندیں ہوئیں آکھیا جو اسلاموفوبیا کوں اساکوں رل تے روکݨ دی لوڑھ اے۔ انہاں آکھیا جو نائن الیون دے بعد دہشت گردی کوں کجھ حلقیاں ولوں اسلام نال جوڑیا ڳیا۔ ایں نال دائیں بازو، زینو فوبک تے پرتشدد قومیت پرستی، انتہا پسندی اتے دہشت گرد گروپاں دے مسلماناں کوں ہدف بݨاوݨ دے رجحان ودھ ڳیا۔ اقوام متحدہ عالمی انسداد دہشت گردی حکمت عملی انہاں ابھردے ہوئے خطرات کوں منیے، اساں امید کریندوں جو سیکرٹری جنرل دی رپورٹ اچ اسلامو فوبیا اتے دائیں بازو دے انتہا پسنداں توں درپیش دہشت گردی دے انہاں خطریاں تے توجہ ݙتی ویسی۔ وزیراعظم اقوام متحدہ سیکرٹری جنرل تے زور ݙتا جو او اسلاموفوبیا اچ ودھارے کوں روکݨ بارے عالمی مکالمے دا اہتمام کرن۔ انہاں دے نال نال اساݙی متوازی کوششاں ہم آہنگی دے ودھارے کیتے ہووݨٰ چاہیدن اتے جاری رہوݨی چاہیدن۔ انہاں آکھیا جو اسلاموفوبیا دے خطرناک رجحان کوں رل تے روکݨ دی لوڑھ اے، ایں ویلھے اسلاموفوبیا دی بدترین اتے سرایت پذیر شکل دا بھارت تے راج اے، اسلاموفوبیا اچ ودھارے کوں روکݨ بارے عالمی مکالمہ کیتا ونڄے۔ وزیراعظم بدعنوانی دا ذکر کریندیں ہوئیں آکھیا جو ترقی پذیر دنیا دے انہاں دے کرپٹ حکمرانان اشرافیہ ولوں لٹ مار پاروں امیر اتے غریب ملکاں وچال فرق خطرناک رفتار حد تئیں ودھدا پئے۔ انہاں ایں پلیٹ فارم توں دنیا دی توجہ ترقی پذیر ملکاں توں ناجائز سرمائے کوں ٻہائو دی لعنت آلے پاسے مبذول کراوݨ دا ذکر کریندیں ہوئیں آکھیا جو مالیاتی احتساب، شفافیت اتے سالمیت (ایف اے سی ٹی آئی) بارے اچ سیکرٹری جنرل دے اعلیٰ سطحی پینل تخمینہ لاتے جو ست ٹریلین ڈالر دے چوری تھیے اثاثے محفوظ ٹھکاݨے تے ہن۔ انہاں آکھیا جو اے منظم چوری اتے اثاثہ جات دی غیر قانونی منتقلی تقی پذیر قوم تے گہرت منفی اثرات پیندی اے۔ وزیراعظم آکھیا جو جنرل اسمبلی کوں ایں بہوں پریشان کن اتے اخلاقی طور تے ناگوار صورتحال دے تدارک کیتے بامقصد اقدامات کرݨے چاہیدن۔ وزیراعظم آکھیا جو موسمیاتی تبدیلی اڄ اساݙے کرہ ارض دے وجود کوں لاحق خطریاں اچوں ہک اے۔ پاکستان دا عالمی سطح تے مضر گیساں دے اخراج اچ حصہ نہ ہووݨ دے برابر اے، ولاں وی اساں دنیا اچ موسمیاتی تبدیلی دے اثرات دے ݙاہ زد پذیر ملکاں اچ شامل ہیسے ۔ انہاں آکھیا جو اساں عالمی ذمہ واریاں بارے ڄاݨدوں اتے اساں کایا پلٹ ماحولیاتی پروگرام ݙاہ ارب ٹری سونامی نال پاکستان اچ ولا جنگلات لاتن، قومی کوں دے تحفظ، قابل تجدید توانائی آلے پاسے ونجݨ، آپݨے شہراں توں آلودگی مکاوݨ اتے موسمیاتی تبدیلی دے اثرات توں موافقت دے رستے تے ٹردے پیوں۔ انہاں آکھیا جو کورونا وبا اقتصادی مندی اتے موسمیاتی ایمرجنسی دے سہ جہتی بحران نال نبڑݨ کیتے اساکوں ہک جامع حکمت عملی چاہیدی اے جیڑھی جو ترائے معاملیاں تے ہووݨی چاہیدی اے۔ ویکسین اچ مساوات ہووے، ہر ہک کوں، ہر ڄاہ کورونا دے خلاف جتنی جلدی تھی سڳے ویکسین ݙتی ونڄے۔ ترقی پذیر ملکاں کوں مناسب سرمایہ دستیاب ہووݨا چاہیدے۔ اے قرضیاں دی جامع ری سٹرکچرنگ، توسیع شدہ او ڈی اے، استعمال شدہ ایس ڈی آرز دی تقسیم نو اتے ایس ڈی آرز دا وسیع تر حصہ ترقی پذیر ملکاں کوں مختص کرݨ اتے کلائمیٹ فنانسن نال یقینی ٻݨایا ونڄ سڳدے۔ وزیراعظم تجویز کیتا جو سیکرٹری جنرل پائیدار ترقیاتی اہداف (ایس ڈی جیز) دے جائزے اتے تیز تر عملدرآمد کیتے 2025ء اچ ایس ڈی جی سمٹ سݙے۔ وزیراعظم عمران خان کورونا دی عالمی وبا دے درپیش چیلنجز دا ذکر کریندیں ہوئیں آکھیا جو کورونا ، منسلکہ اقتصادی بحران اتے ماحولیاتی تبدیلی پاروں لاحق خطریاں دے سہ جہتی چیلنجز دا سامݨا اے۔ انہاں آکھیا جو اللہ تعالیٰ دے فضل نال پاکستان ہݨ تئیں کورونا وبا نال لڑݨ اچ کامیاب تھندا پئے، اساݙی سمارٹ لاک ڈائوں دی پالیسی قیمتی جاناں اتے روزگار کوں بچاوݨ دے نال نال معیشت کوں رواں رکھیے۔ اساݙے سماجی تحفظ دے پروگرام احساس نال ݙیݙھ کروڑ توں ودھ ٹبراں کوں بچایا ڳے۔ وزیراعظم خطاب دے شروع اچ جنرل اسمبلی دے 76ویں اجلاس دی صدارت سنبھالݨ تے عبداﷲشاہد کوں مبارخ ݙتی جڈانجو انہاں دے پیشرو وولکن بوزکر دی کامیابیاں تے انہاں کوں خراج تحسین پیش کیتا۔
