وفاقی حکومت کراچی سرکلر ریلوے دے منصوبے کیتے پرعزم اے، مسئلیاں دے حل کیتے وفاقی اتے صوبائی حکومتاں کوں رَل تے چلݨا پمسی، بنڈل آئی لینڈ منصوبے نال کراچی اچ سرمایہ کاری امسی۔ وزیراعظم عمران خان

کراچی۔27ستمبر (اے پی پی) وزیراعظم عمران خان آکھیا جو وفاقی حکومت کراچی سرکلر ریلوے دے منصوبے کیتے پرعزم اے، مسئلیاں دے حل کیتے وفاقی اتے صوبائی حکومتاں کوں رَل تے چلݨا پمسی، بنڈل آئی لینڈ منصوبے نال کراچی اچ سرمایہ کاری امسی، اے منصوبہ سندھ اتے پورے پاکستان کیتے فائدہ مند ہوسی۔ اے ڳالھیں انہاں سنوار کوں کراچی اچ جدید سرکلر ریلوے دے منصوبے دا منݙھ بدھݨ دی تقریب نال خطاب کریندیں ہوئیں آکھی۔ ایں موقع تے گورنرسندھ عمران اسماعیل، وزیراعلیٰ سندھ مرادعلی شاہ، وفاقی وزیر اطلاعات و نشریات چوہدری فواد حسین، وفاقی وزیر بحری امور سید علی زیدی، وزیر وزیرمنصوبہ بندی اسد عمر، وفاقی وزیر ریلوے اعظم سواتی وی موجود ہن۔ وزیراعظم آکھیا جو کراچی پاکستان کیتے ٻہوں اہمیت رکھیندے، سارے وݙے ملکاں دی ترقی اچ کوئی ہک وݙا شہر ای لیڈ کریندے تاں نظر امدے، کراچی دی اہمیت وی اینویں اے پر بدقسمتی نال ماضی اچ کراچی ترقی آلے پاسے تھیا اتے انتشار دا شکار تھی ڳیا۔ انہاں آکھیا جو کراچی دی ترقی صرف کراچی کیتے نی پورے پاکستان کیتے فائدہ مند اے۔ انہاں آکھیا جو گرین لائن بس سروس وی اہم منصوبہ اے۔ انہاں آکھیا جو سیاسی اختلافات دے باوجود سندھ اتے ملک کیتے کراچی دے مسئلے دے حل کیتے وفاقی اتے صوبائی حکومتاں کوں رَل تے چلݨا پمسی۔ انہاں وزیراعلیٰ سندھ کوں مخاطب کر تے آکھیا جو بنڈل آئی لینڈ دے منصوبے دا ولا جائزہ گھنن، ایں منصوبے نال کراچی اچ سرمایہ کاری امسی۔ وزیراعظم آکھیا جو میکوں خوشی اے جو کراچی ٹرانسفارمیشن پلان تے عمل تھیندا پئے۔ کراچی کیتے نالیاں دی صفائی اتے سڑکاں دی تعمیر تے وی کم جاری اے۔