اسلام آباد۔11اکتوبر (اے پی پی):وزیراعظم دے نمائندہ خصوصی بین المذاہب ہم آہنگی و مشرق وسطی امور اتے پاکستان علما کونسل دے چیئرمین حافظ محمد طاہر محمود اشرفی آکھیے جو نبی اکرم ﷺدی زندگی دا کوئی پہلو مخفی کائنی ، قیامت دے ݙینھ تئیں آپﷺ دی سیرت مشعل راہ اے، وزیراعظم عمران خان عشرہ سیرت طیبہ کیتے اتھارٹی دے قیام دا اعلان کیتے ، ٻدھ کوں اسلام آباد اچ سیرت النبی ﷺدے حوالے نال سیمینار دا انعقاد کیتا ویسی ، جمعہ کوں لاہور اچ ھک چرچ اچ سیرت سیمینار تھیسی ۔ سنوار کوں اتھاں پریس کانفرنس توں خطاب کریندے ہوئیں انہاں آکھیے جو وزیراعظم عمران خان پورے ملک اچ عشرہ رحمت اللعالمینﷺ دے عنوان تے تقریبات دا افتتاح کیتے اتے ایں حوالے نال سیرت رحمت اللعالمین ﷺاتھارٹی دے قیام دا اعلان کیتے جیں دا اندرلے تے ٻاہرلے ملکاں اچ خیر مقدم کیتا ویندا پئے ، ایں اتھارٹی دے قیام دا مقصد پوری دنیا اچ سیرت طیبہ دے حوالے نال آڳاہی ݙیوݨا اے ۔ انہاں آکھیے جتھاں اساکوں انہاں ݙینھاں اچ سیرت نبوی ﷺمناوݨا اے تاں ایندے تے عمل وی کرݨا اے ایں حوالے نال وزارت مذہبی امور، وزارت اطلاعات اتے سارے صوبیں دے محکمہ اوقاف پروگرامات ترتیب ݙتن ۔ انہاں آکھیے جو آندے جمعہ کوں سیرت طیبہ دی روشنی اچ اخلاق حسنہ، عورتاں تے اقلیتاں دے حقوق موضوع ہوسن جیں تے پورے ملک دے علما و مشائخ ڳال مہاڑ کریسن ، ایندا مقصد سیرت طیبہ دے سارے پہلوواں کوں دنیا دے سامݨے گھن آوݨا اے ، حضور اکرم ﷺصرف رحمت المسلمین کائنی رحمت اللعالمینﷺ ہن، نبی اکرم دی زندگی دا کوئی پہلو مخفی کائنی ، قیامت دے ݙینھ تئیں آپ ﷺ دی سیرت سارے انساناں کیتے مشعل راہ اے۔ اساکوں کردار سازی دے پاسے ونڄݨا اے جیڑھی جو ویلھے دی اہم لوڑھ اے ، ٻدھ کوں اسلام آباد اچ ھک سیمینار تھیسی جیں اچ وفاقی وزیر مذہبی امور ڈاکٹر نور الحق قادری، وفاقی وزیر اطلاعات و نشریات چوہدری فواد حسین اتے پورے ملک دے علما و مشائخ شرکت کریسن جیں دا عنوان “عورتاں اتے اقلیتاں دے حقوق شریعت اسلامیہ دی روشنی وچ ہوسی ، انہاں آکھیے جو ایں واری تھیوݨ آلیاں تقریباں کوں انڄ انڄ موضوع ݙتا ڳئے تاں جو قوم دے سامݨے سیرت دے ہر پہلو کوں گھن آیا ونڄے ، انہاں آکھیے جو نوجوان نسل کوں ݙساوݨ دی لوڑھ اے جو حضرت محمدﷺ فرمایا جو تعلیم حاصل کرݨ ساریں تے فرض اے بھاویں او مرد ہووے یا تریمت ، کجھ لوک آپݨا شملہ اچا کرݨ کیتے ٻالڑیاں کوں تعلیم توں روکیندن ، انہاں آکھیے جو حضور اکرم ﷺ مسیحیاں کوں مسیت نبوی اچ عبادت دی اجازت ݙتی، ایں طرح اساکوں آپݨی نوجوان نسل کوں سیرت طیبہ بارے ݙساوݨا اے۔ ، 12 ربیع الاول کوں ݙو ݙینھ وار سیرت کانفرنس دا انعقاد کیتا ویسی ایں واری تقریب کوں ھک منظم شکل ݙتی ڳئی اے ۔ پریس کانفرنس توں پہلے وزیراعظم دے نمائندہ خصوصی حافظ طاہر محمود اشرفی اتے علمائے کرام دی طرفوں محسن پاکستان ڈاکٹر عبدالقدیر خان کیتے مغفرت دی دعا کیتی ڳئی علامہ طاہر اشرفی علما کرام اتے میڈیا دے نمائندیں دعا کیتی جو اللہ پاک ڈاکٹر عبدالقدیر خان کوں جنت اچ اعلی جاہ عطا فرماوے۔
