اسلام آباد۔12اکتوبر (اے پی پی):وزیراعظم دے معاون خصوصی فوڈ سیکورٹی جمشید اقبال چیمہ آکھیے جو کھنڈ دیاں قیمتاں آندے مہینے توں گھٹ تھی ویسن ،80 روپے یا ایندے توں گھٹ قیمت کھنڈ ویچی ویسی ، جیں دی مانیٹرنگ حکومت کریسی ، اڄوکے سیزن دے دوران ڳنے دی بھرپور پیدوار ہوسی ،ملک اچ ایں ویلھے وی کھنڈ دی قیمت بین الاقوامی مارکیٹ توں گھٹ اے ، اے ڳال انہاں منڳل کوں کھنڈ دیاں قیمتاں دے حوالے نال خصوصی ڳال مہاڑ کریندے ہوئیں آکھی اے ، انہاں آکھیے جو کھنڈ دیاں قیمتاں آندے مہینے توں گھٹ تھیوݨ شروع تھی ویسن ، انہاں آکھیے اڄوکے سیزن دے دوارن ڳنے دی 100 ملین ٹن توں ودھ پیداوار متوقع اےجیں توں اندازاً 9 ملین ٹن کھنڈ پیدا تھی سڳسی ساݙی قومی ضرورت 1۔6 ملین ٹن اے، انہاں آکھیے جو ایں سال کھنڈ دی پیداوار ݙیڈھ سال دی ضرورت پورا کریسی ،اساں ڳنے دی گھٹ تو گھٹ تے ودھ توں ودھ قیمت مقرر کرݨ دے نال نال کھنڈ دی قیمت وی فکسڈ کریندے پیوں انہاں آکھیے جو کساناں کوں ڳنے دی قیمت ملݨ دے نال نال شوگر ملاں تے تاجراں کوں پورے منافع دی ادائیگی تھی سڳسی ۔ انہاں آکھیے جو 80 روپے یا ایندے توں گھٹ قیمت تے کھنڈ ویچی ویسی جیڑھی جو حکومت دے کنٹرول تے مانیٹرنگ اچ ہوسی تاں جو کوئی اینکوں مہانگا نہ ویچ سڳے ۔
