اسلام آباد۔3مارچ(اے پی پی) صدر مملکت ڈاکٹر عارف علوی خصوصی لوکاں کوں معاشرے دا فعال رکن بݨاوݨ اچ مدد ݙیوݨ کیتے زندگی دے سارے شعبیں بالخصوص تعلیم اچ انہاں کیتے جامع نقطہ نظر اپناوݨ دی لوڑھ تے زور ݙیندے ہوئیں آکھیے جو سوائے کجھ ذہنی عوارض دے باہم معذور ٻالاں کوں ریگولر سکولاں اچ تعلیم ݙیوݨ توں علاوہ انہاں کوں انہاں دی صلاحیت تے مہارت دے مطابق ملازمتاں ݙتیاں ونڄݨیاں چاہیدن ۔ جمعہ کوں اتھاں پاکستان انسٹی ٹیوٹ آف میڈیکل سائنسز (پمز) اچ 5ویں’’سیریبرل پالیسی کانفرنس‘‘توں خطاب کریندے ہوئیں آنہاں آکھیے جسمانی تے ذہنی طور تے معذور ٻالاں کوں معاشرے دی طرفوں ݙیکھ بھال تے ہمدردی دی لوڑھ ہوندی اے انہاں کوں ݙوجھے ٻالاں وانڳوں قبول کرݨ کیتے تیار رہݨا چاہیدے ۔ صدر مملکت آکھیے کہیں جسمانی معذوری یا بصارت اتے سماعت توں محروم لوکاں دی ذہنی صلاحیت ݙوجھے لوکاں دے برابر ہوندی اے ایں کیتے انہاں کوں بہتر طریقے نال کم کرݨ اچ مدد کیتے معاشرے دے تعاون دی لوڑھ اے ۔ صدر مملکت جسمانی اتے ذہنی کمزوریاں دے شکار لوکاں دے نال ہمدردی دا مظاہرہ کرݨ کیتے معاشرے اچ شعور جڳاوݨ تے زور ݙتا۔ انہاں ایں ڳالھ تے افسوس دا اظہار کیتے جو دماغی عوارض نال وابستہ ممنوعات توں پرہیز کیتا ونڄݨا چاہیدے ۔ انہاں آکھیے خاتون اول ثمینہ علوی آگاہی مہم دے ذریعے عوامی مقامات تے خصوصی لوکاں کیتے سہولتاں ݙیوݨ سودھے انہاں دی فلاح و بہبود دی اہمیت کوں اجاگر کرݨ اچ آپݨی بہترین کوششاں کیتن ۔ صدر عارف علوی آکھیے علاج معالجے کیتے ڈاکٹراں دی تربیت ٻہوں ضروری اے۔
