اسلام آباد۔4مارچ(اے پی پی):وفاقی وزیر سینیٹر محمد اسحاق ڈار دی صدارت اچ حج پالیسی 2023ء متعلق جائزہ اجلاس ہفتے کوں اتھاں وزارت خزانہ اچ تھیا ۔ وفاقی وزیر مذہبی امور و بین المذاہب ہم آہنگی مفتی عبدالشکور، وزیر اعظم دے معاون خصوصی فنانس طارق باجوہ، سپیشل سیکرٹری فنانس اتے وزارت خزانہ و وزارت مذہبی امور دے اعلی حکام وی اجلاس اچ شرکت کیتی۔ وزارت خزانہ دی طرفوں جاری اعلامیہ موجب اجلاس دے شرکاء کوں حج پالیسی 2023ء تے بریفنگ ݙتی ڳئی تے ݙسایا ڳئے جو اڄوکے سال پاکستان توں کتنے عازمین حج دیاں درخواستاں دی وصولی متوقع ہے۔ اجلاس کوں اے وی ݙسایا ڳئے جو اڄوکے سال تقریباً ھک لکھ 79 ہزار پاکستانی حج دی سعادت حاصل کریسن ۔ وفاقی وزیر مذہبی امور و بین المذاہب ہم آہنگی مفتی عبدالشکور وفاقی وزیر خزانہ کوں زرمبادلہ دے کجھ مسئلیں بارے ݙسایا تے انہاں دی معاونت منگی ۔ وزیر خزانہ سینیٹر محمد اسحاق ڈار آکھیے حج مذہبی فریضہ اے جیڑھا جو ہر صاحب حیثیت مسلمان کوں ادا کرݨا چاہیدے اتے اساں اللہ دے فضل و کرم نال اپݨا کردار بخوبی ادا کریسن ۔ وزیر خزانہ حج دے مذہبی ایونٹ کوں کامیاب بݨاوݨ تے عازمین حج کوں ہر طرح دے مکمل تعاون دی فراہمی دا اعادہ کیتے۔ وفاقی وزیر مذہبی امور وزیر خزانہ دے تعاون تے اظہار تشکر وی کیتا۔
