اسلام آباد۔4 مارچ(اے پی پی) وزیراعظم محمد شہباز شریف 5 اتے 6 مارچ کوں قطر اچ منعقد تھیوݨ آلی گھٹ ترقی یافتہ ملکاں (ایل ڈی سیز) دے حوالے نال اقوام متحدہ دی پنجویں کانفرنس اچ شرکت کریسن ۔ وزیراعظم کوں قطر دے دورے دے دعوت قطر دے امیر دی طرفوں ݙتی ڳئی ہئی ۔ ترجمان دفتر خارجہ دی طرفوں ہفتے کوں جاری کیتے ڳئے اعلامیہ موجب کانفرنس دا انعقاد 5 توں 9 مارچ 2023 کوں ہوسی جیں اچ گھٹ ترقی یافتہ ملکاں اچ پائیدار ترقی دے ودھارے دے اقدامات دا جائزہ ڳھدا ویسی عالمی رہنما عالمی امدادی کارروائیاں کوں متحرک کریسن تاں جو انہاں ملکاں کوں خوشحالی دی شاہراہ تے گامزن کیتا ونڄ سڳے ۔ اپݨے دورہ دے دوران کانفرنس اچ شرکت دے علاوہ وزیراعظم محمد شہباز شریف دوحہ اچ مختلف عالمی رہنماواں، وفد دے سربراہواں نال ملاقاتاں کریسن ۔ کانفرنس اچ بین الاقوامی رہنما گھٹ ترقی یافتہ ملکاں دی معاونت دے حوالے نال بین الاقوامی تعاون دے ودھارے دے اقدامات دا جائزہ گھنسن جیں تے ترقیاتی شراکت داراں دی طرفوں اتفاق کیتا ڳئے ۔ پاکستان اقوام متحدہ دے پلیٹ فارم تے عالمی سطح تے پائیدار ترقی دے ودھارے دے اقدامات دے حوالے نال اہم کردار ادا کریندا پئے ۔ سال 2022 اچ جی 77 اتے چین دے اجلاس دی صدارت کریندے ہوئیں پاکستان ایل ڈی سیز دی امداد دے حوالے نال موثر اقدامات کوں یقینی بݨایا۔ ترجمان دفتر خارجہ موجب وزیراعظم محمد شہباز شریف دی کانفرنس اچ شرکت توں گھٹ ترقی یافتہ ملکاں دی پاکستان دی طرفوں سپورٹ اچ مدد ملسی جیں توں ایل ڈی سیز دی معاشی اتے سماجی ترقی و خوشحالی اچ ودھارا تھیسی ۔ ترجمان دفتر خارجہ آکھیے پاکستان اقوام متحدہ دے 2030 دے ساؤتھ کوآپریشن فریم ورک اتے پائیدار ترقی دے اہداف دے حصول دے ایجنڈا دے تحت موثر بین الاقوامی شراکتداری دی بھرپور حمایت کریندے ۔
