اسلام آباد۔8 مارچ(اے پی پی)وفاقی وزیر داخلہ رانا ثنا اللہ آکھیے جو فارن فنڈنگ، توشہ خان کیساں اچ عمران خان کوں جتنی وتھی ملݨی ہئی او مل چکی اے ہݨ انہاں کوں 13 مارچ دے بعد کوئی چھوت نا ݙتی ویسی، جیکر عمران خان سیاسی سرگرمیاں کیتے فت تھی سڳدن تاں ول عدالت وی پیش تھیون، عمران خان عدالت دی پچھلی سماعت ویلھے چڑھائی کرتے بے نقاب تھی چکیے، عمران خان دا فساد کھنݙاوݨ لو برگر مارچ کریندے پین جیندے بارے نگران حکومت سکیورٹی خدشات پاروں دفعہ 144 لائی اے۔ اسلام آباد اچ پریس کانفرنس کریندے انہاں آکھیا جو اڄ دے ݙینھ مارچ دا اعلان ڄاݨ ٻڄھ تے کیتے جو عورت مارچ اتے حیا مارچ دے موقع تے کوئی فساد کھنݙیڄے، ایں صورتحال اچ کوئی وی ناخوشگوار واقعہ پیش آ سڳدے، نگران پنجاب حکومت برگر مارچ توں ریلی دا روٹ منگیے ٻھل انہاں کوئی ولدا نئیں ݙتا تہوں دفعہ 144 لاوݨا پئے۔ انہاں آکھیا جو عمران خان کولو ولدا ہوندا تاں عدالتاں اچ پت ݙیندے ٻھل ہم سارے بہانے اتے ریلیف دے موقع مک چکین، عدالتاں توں امید اے جو عمران خان دے کیسز اچ غیر جانبداری نظر آوے، امید اے جو عمران خان کوں ٻیا ریلیف نا ݙتا ویسی، جیکر عمران خان ایوین لکیے ریہے تاں آخری آپشن گرفتار ہی ٻݨدے۔ انہاں آکھیا جو چیئرمین نیب کوں قابلیت اتے شفافیت دی بنیاد تے لایا ڳئے، امید اے او انصاف اتے احتساب تے پورا اترسن۔
