ملتان۔9مارچ (اے پی پی):وزیرمملکت تخفیف غربت و سماجی تحفظ فیصل کریم کنڈی آکھیے پاکستان پیپلزپارٹی پنجاب اچ وختی وݙا سرپرائز ݙیسی ۔اے ڳالھ انہاں خمیس کوں ملتان اچ پریس کانفرنس کریندے ہوئیں آکھی اے ۔ فیصل کریم کنڈی آکھیے بے نظیر انکم سپورٹ پروگرام (بی آئی ایس پی) غیر سیاسی پروگرام اے،ودھ توں ودھ مستحق لوکاں دی سہولت کیتے ایندے اچ مزید اصلاحات کیتیاں ویندیاں پئن ،تقریباً 89 لکھ مستحق خانداناں دی ایں پروگرام دے ذریعے مالی اعانت کیتی ویندی پئی اے ،کفالت پروگرام دے تحت مستفید تھیوݨ آلے خانداناں کوں 25 فیصد اضافی رقم ݙیسوں ،پی ٹی آئی حکومت بی آئی ایس پی پروگرام اچ فلٹرز لاتے 8 توں 9 لکھ مستحقین دے کارڈ بند کرݙتے ہن ،اساں جانچ کرݨ دے بعد انہاں کوں ول پروگرام اچ رلیسوں ۔
