اسلام آباد۔10مارچ(اے پی پی)وزیر اعظم محمد شہباز شریف شی جن پنگ کوں تریجھی واری چین دا صدر منتخب تھیوݨ تے مبارخ ݙیندے ہوئیں آکھیے جو چین دے عوام اتے پارلیمان دا انہاں تے اعتماد انہاں دی غیر معمولی قائدانہ صلاحیتاں دا اعتراف اے، صدر شی جن پنگ چین دی ترقی اتے خوشحالی دی علامت بݨ چکن ۔ وزیراعظم آفس دے میڈیاونگ توں جاری بیان موجب شی جن پنگ دے تریجھی واری چین دا صدر منتخب تھیوݨ تے آپݨے تہنیتی پیغام اچ وزیراعظم آکھیے انہاں کوں آندے پنج سال کیتے چین دا صدر منتخب تھیوݨ تے پاکستان دی حکومت تے عوام دی طرفوں مبارخ باد ݙیندوں ۔صدر شی جن پنگ تے چین دے عوام تے پارلیمںٹ دا اعتماد انہاں دی غیرمعمولی قائدانہ صلاحیتاں دا اعتراف اے۔صدر شی جن پنگ چین دی ترقی اتے عوام دی خوشحالی دی علامت بݨ چکن ۔ وزیراعظم آکھیے انہاں دی قیادت اچ چین دنیا دی سرفہرست معاشی قوت بݨ چکیے تے اے سفر مسلسل جاری اے ۔ صدر شی جن پنگ دی بصیرت افروز قیادت اچ چین تعلیم، صحت، زراعت، ایجادات، ٹیکنالوجی سودھے ہر شعبے اچ حیرت انگیز کامیابیاں حاصل کریندا پئے ۔ وزیراعظم امید ظاہر کیتی جو صدر شی جن پنگ دی پنج سال دی مدت صدارت اچ ݙوہیں ملکاں دی آزمودہ تے سدا بہار سٹریٹیجک کوآپریشن مزید مضبوط تھیسی۔ اساں صدر شی جن پنگ، چین دی حکومت اتے عوام کیتے نیک تمناواں دا اظہار کریندوں۔
