اسلام آباد۔10مارچ (اے پی پی) وفاقی حکومت بلوچستان کیتے 110 بلین روپے (400 ملین امریکی ڈالر) دی لاگت دے سیلاب دی بحالی اتے تعمیر نو دے پیکیج تے عملدرآمد کیتے اپݨی کوششاں تکھی کر ݙتن۔ ایں بارے 2022 دے بعد دے چھل دی تعمیر تے بحالی دے منصوبے دی پہلی باضابطہ سٹیئرنگ کمیٹی دا اجلاس جمعے کوں تھیا۔اجلاس دی سانجھی صدارت وفاقی وزیر برائے منصوبہ بندی ترقی و خصوصی اقدامات احسن اقبال اتے وزیر اعلیٰ بلوچستان ولوں صوبائی وزراء برائے خزانہ تے منصوبہ بندی کیتی۔اجلاس اچ سیکرٹری وزارت آبی وسائل، ایڈیشنل سیکرٹری وزارت منصوبہ بندی، وزارت منصوبہ بندی دے نمائندے شریک تھیے اتے اقتصادی امور ڈویژن، بلوچستان دے صوبائی نمائندے اتے ٻے سٹیک ہولڈرز وی اجلاس اچ شریک تھیے۔ اجلاس توں خطاب کریندیں ہوئیں وفاقی وزیر منصوبہ بندی احسن اقبال ایں ڳالھ تے روشنی پاتی جو بلوچستان دی سماجی تے اقتصادی ترقی گزریل سال اپریل اچ اقتدار اچ آوݨ دے بعد توں پی ڈی ایم حکومت دی پہلی ترجیح رہی اے۔ سٹیئرنگ کمیٹی بلوچستان توں پراجیکٹ ڈائریکٹر دی تقرری اتے کریڈٹ ایگریمنٹ تے دستخط دا عمل شروع کرݨ دی منظوری ݙے ݙتی۔
