ملک اچے مینہ پاروں ممکنہ موسمی صورتحال دے اثرات پاروں متعلقہ ادارے الرٹ رہن، محکمہ موسمیات

اسلام آباد۔15مارچ (اے پی پی) ملک دے مختلف حصیاں اچ 16 مارچ توں اندھاری، مٹی دی ہوائیں اتے ڳاڄ کھمݨ نال مینہ اتے ڳڑھا پووݨ بارے ممکنہ موسمی صورتحال دے اثرات بارے سیاحاں کوں محتاط اتے معتلقہ اداریاں کوں الرٹ رہݨ دا مشورہ ݙتا ڳے۔ ایں وچال کھڑی فصلاں کوں نقصان پڄݨ اتے پہاڑی علاقیاں اچ لینڈ سلائیڈنگ دا خدشہ نشابر کیتا ڳے۔ محکمہ موسمیات موجب مغربی ہواؤں دا نظام 16 مارچ کوں ملک دے اتلے علاقیاں اچ امسی جیڑھا 17 مارچ کوں ملک دے اتلے اتے وسطی علاقیاں اچ کھںڈ ویسی۔ اے ہوائیں 20 مارچ تئیں رہسن۔ ایں نظام پاروں خیبر پختونخوا اچ 16 توں 20 مارچ وچال چترال، دیر، سوات، مانسہرہ ،ایبٹ آباد، کوہستان، شانگلہ، بونیر، ہری پور، کرک ، پشاور، کوہاٹ، چارسدہ ،نوشہرہ، صوابی ،باجوڑ، کرم ، وزیرستان ، بنو ں اتے ڈیرہ اسماعیل خان اچ تکھی ہوائیں اتے ڳاڄ کھمݨ نال مینہ وسݨ دا امکان اے۔ پنجاب اتے اسلام آباد اچ 16 توں 20 مارچ وچال مری، گلیات، اسلام آباد، راولپنڈی، اٹک، چکوال، جہلم، گوجرانوالہ، گجرات، حافظ آباد، منڈی بہائو الدین، سیالکوٹ نارروال اتے لاہور جڈانجو 17 توں 18 مارچ وچال فیصل آباد، ٹوبہ ٹیک سنگھ، جھنگ، قصور، شیخوپورہ ،ننکانہ صاحب، خوشاب، میانوالی، سرگودھا، ملتان، ڈیرہ غازی خان، بھکر ، لیہ ، کوٹ ادو، خانیوال، ساہیوال، پاکپتن اتے بہاولپور اچ اندھاری، مٹی دی ہوائیں اتے ڳاڄ کھمݨ نال مینہ وسݨ دا امکان اے۔