ملک اچ مالیاتی مینجمنٹ کوں چنڳاں بݨایا ڳئے مہانگ ہݨ گھٹ تھیسی ، ڈاکٹر شمشاد اختر

اسلام آباد۔24نومبر  (اے پی پی):نگران وفاقی وزیر خزانہ ڈاکٹر شمشاد اختر آکھیے ملک اچ مالیاتی مینجمنٹ کوں چنڳاں بݨایا ڳئے مہانگ ہݨ گھٹ تھیسی۔ سینیٹ اچ سینیٹر مشتاق احمد، سینیٹر دنیش کمار، پلوشہ زئی دے سوالاں دے جواب اچ نگران وفاقی وزیر خزانہ ڈاکٹر شمشاد اختر ݙسائے جو سٹیٹ بینک آف پاکستان ھک کارپوریٹ باڈی اے تے ایندا اپݨا بورڈ آف ڈائریکٹرز اے، سٹیٹ بینک اچ ملازمین دی تعداد کل 1100 توں ودھ اے ، انہاں اچوں 75 ملازمین کنٹریکٹ تے ہن ۔ انہاں ݙسائے جو 2022-23 دے بجٹ اچ ملازمین دیاں تنخواہواں کیتے 6 ارب 88 کروڑ روپے توں ودھ رکھیے ڳئن ۔ انہاں آکھیے جو سٹیٹ بینک دی خود مختاری دی پارلیمنٹ منظوری ݙتی اے ، سٹیٹ بینک دے ملازمین دیاں تنخواہواں اچ ودھارا مختلف حکومتاں دے دور اچ کیتا ڳئے جے ایندے تے کئی اعتراض ہئی تاں ایندی منظوری نہ ݙتی ویندی ۔ انہاں آکھیے بینکاری دے شعبے اچ تنخواہیں ٻہوں ودھ ڳئن ایں سانڳے سٹیٹ بینک دے افسراں تے ملازمین دیاں تنخواہواں کوں وی ودھایا ویندے ۔ انہاں آکھیے جو ملک اچ مالیاتی مینجمنٹ کوں چنڳاں بݨایا ڳئے تے مہانگ ہݨ گھٹ تھیندی نظر آسی۔