غزہ اچ جاری اسرائیلی جارحیت  ھک غیر معمولی سانحہ اے جیں دا تصور وی نی کیتا ونڄ سڳدا ، نائب وزیر اعظم محمد اسحاق ڈار

استنبول۔8جون(اے پی پی) نائب وزیر اعظم محمد اسحاق ڈار آکھیے جو غزہ اچ جاری اسرائیلی جارحیت ھک غیر معمولی سانحہ اے جیں دا تصور وی نی کیتا ونڄ سڳدا ،اسرائیلی قابض افواج دے ہتھوں 40 ہزارتوں ودھ فلسطینی شہید تھی ڳئن 81 ہزار زخمی تھئن ،انھاں فلسطینیاں اچوں کئی جان لیوا زخماں دی تاپ جھل تے یا وݙے عرصے تئیں معذوری سامݨا کریندے پئن ۔نائب وزیر اعظم  محمد اسحاق ڈار اے ڳالھ  ہفتے کوں استنبول اچ D-8 کونسل برائے وزرائے خارجہ دے اجلاس  توں خطاب اچ آکھی اے ۔ انہاں آکھیے پاکستان دی حکومت تے عوام دی طرفوں میں جمہوریہ ترکیہ اتے وزیر خارجہ ہاکان فیدان دا دلوں شکریہ ادا کرݨ چاہندان ،  جمہوریہ ترکی اتے وزیر خارجہ ہاکان فیدان ایں معاملے تے D-8 وزرائے خارجہ دی کونسل دا اجلاس  کراوݨ سانڳے اے پہلا قدم چاتے ، غزہ اچ اڄ جیڑھا کجھ وی تھیندا پئے او ھک غیر معمولی سانحہ اے جیں دا تصوروی نی کیتا ونڄ سڳدا ۔ نائب وزیر اعظم مزید آکھیے دنیا تریمتاں تے ٻالاں دی غیر متناسب تعداد نال شہریاں دے اندھا دھند قتل دا مشاہدہ کریندی پئی اے ، اسرائیلی فورسز فلسطینیاں دے وجود کوں نشانہ بݨاوݨ سانڳے منظم طریقے نال ہسپتالاں اتے اہم انفراسٹرکچر تے بمباری کریندی پئی اے عالمی ادارہ صحت موجب غزہ دے 36ہسپتالاں اچوں صرف 12 کم کریندے پئن ،  مزید حیرت دی ڳالھ اے ہے جو صحت دیاں ساریاں سہولتاں اچوں 84 فیصد تباہ تھی ڳئن ۔ اسحاق ڈار آکھیے اسرائیل دی مسلسل وحشیانہ جارحیت فلسطینی آبادی کوں صفحہ ہستی توں مٹاوݨ دی کھلی کوشش اے، دنیا بین الاقوامی قانون، عالمی عامہ اتے آئی سی جے دے احکامات دی مکمل طور تے خلاف ورزی کریندی پئی اے ۔