وزیر اعظم سوکھے کاروبار ایکٹ دے حوالے نال قانون سازی شروع کرݨ دی مںظوری ݙے ݙتی

اسلام آباد۔13جون (اے پی پی):وزیر اعظم محمد شہباز شریف سوکھے کاروبار ایکٹ دے حوالے نال قانون سازی شروع کرݨ دی منظوری ݙیندے ہوئیں آکھیے جو ملک اچ کاروبار اتے سرمایہ کار دوست ماحول دی ترویج حکومت دی اولین ترجیح اے ،ون ونڈو آپریشنز دے تحت کاروباری اتے تاجر برادری سانڳے دستاویزی مرحلے سوکھے کیتے ونڄن ،چین دے شہر شینزین دے ون سٹاپ شاپ دی طرز تے تجرباتی (پائلٹ) سہولت مرکز دے قیام دے حوالے نا ل چینی ماہرین توں معاونت ڳھدی ونڄے ۔ وزیراعظم آفس دے میڈیا سیل توں جاری بیان موجب وزیر اعظم محمد شہباز شریف دی صدارت اچ کاروبارتے سرمایہ کاری کرݨ اچ سوکھ دے حوالے نال اقدامات تے اہم جائزہ اجلاس وزیراعظم ہاؤس اچ تھئے ۔وزیراعظم سوکھے کاروبار ایکٹ دے حوالے نال قانون سازی شروع کرݨ دی منظوری ݙیندے ہوئیں آکھیے جو پاکستان اچ کروبار تے سرمایہ کار دوست ماحول دی ترویج اولین ترجیح اے ، انہاں ہدایت کیتی جو ون ونڈو آپریشنز دے تحت کاروباری اتے تاجر برادری سانڳے دستاویزی مرحلے سوکھے کیتے ونڄن ۔ انہاں مزید ہدایت کیتی اے جو چین دے شہر شینزین دے ون سٹاپ شاپ دی طرز تے ھک تجرباتی (پائلٹ) سہولت مرکز دے قیام دے حوالے نال چینی ماہرین توں معاونت ڳھدی ونڄے ۔اجلاس کوں سوکھے کاروبار تے ٻئے اقدامات تے بریفنگ ݙتی ڳئی ۔ اجلاس کوں ݙسایا ڳئے جو کاروبار دی رجسٹریشن ، لائیسنسز سرٹیفیکیٹس اتے ٻئی دستاویزات سانڳے الیکٹرانک رجسٹری دا قیام عمل اچ گھن آیا ویسی ۔ آن لائن ون ونڈو پاکستان بزنس پورٹل دا نظام متعارف کروایا ویسی جیں دے ذریعے سارے متعلقہ اداریں دی خدمات ڳھدیاں ویسن ۔ اجلاس اچ وفاقی وزیر اقتصادی امور احد خان چیمہ ، وفاقی وزیر خزانہ و محصولات محمد اورنگزیب ، وفاقی وزیر صنعت و پیداوار رانا تنویر حسین ، وفاقی وزیر پٹرولیم مصدق ملک ،وزیر مملکت خزانہ و محصولات علی پرویز ملک ، وزیراعظم دے کوآرڈینیٹر رانا احسان افضل ،چارے صوبیں دے چیف سیکرٹریز اتے متعلقہ اعلیٰ سرکاری افسراں شرکت کیتی۔