وفاقی وزیرمحسن نقوی نال کینیڈین ہائی کمشنر لیسلی سکینلون دی ملاقات

اسلام آباد۔21جون(اے پی پی):وفاقی وزیر داخلہ و انسداد منشیات محسن نقوی نال کینیڈین ہائی کمشنر لیسلی سکینلون ملاقات کیتی جیں اچ ݙوپاسے تعلقات سودھے سانجھی دلچسپی دے امور، بارڈر سکیورٹی، امیگریشن، غیر قانونی انسانی سمگلنگ تے منشیات دی سمگلنگ روکݨ دے حوالے نال ڳالھ مہاڑ کیتی ڳئی۔ وزیر داخلہ محسن نقوی آکھیے پاکستان اپݨے بارڈر کوں محفوظ بݨاوݨ ، غیر قانونی نقل و حرکت اتے انسانی سمگلنگ روکݨ دی ہر ممکن کوشش کریندا پئے ایں ضمن اچ متعلقہ اداریں دی استعداد کار ودھاوݨ سانڳے سارے اقدامات چاتے ویندے پئن، اساں امیگریشن دے سسٹم اچ وی جدت اتے بہتری گھن آندے پیوں ، الیکٹرانک ٹریول اتھارائزیشن دے نظام اچ مزید بہتری گھن آندے پیوں، چووی گھنٹے اچ ویزہ جاری کیتا ویسی انہاں آکھیے پاکستان مختلف شعبیں اچ کینیڈا کوں ہنر مند افرادی قوت ݙے سڳدے، ہنر مند افرادی قوت دی کینیڈا منتقلی نال غیر قانونی انسانی سمگلنگ دے واقعات گھٹ ویسن ۔ انہاں آکھیے پاکستان اچ رہݨ آلیاں ساریاں اقلیتاں کوں آئین پاکستان دے تحت برابر دے حقوق حاصل ہن، اقلیتاں دے حقوق دا تحفظ حکومت پاکستان دی ذمہ واری اے۔ انہاں آکھیے افغان مہاجرین دی کینیڈا منتقلی اچ پاکستان ہر ممکن سہولتاں ݙیندا پئے ۔کینیڈین ہائی کمشنر مختلف شعبیں اچ تعاون تے وزیر داخلہ  محسن نقوی دا شکریہ ادا کیتے۔ملاقات اچ کینیڈین ہائی کمیشن دے اعلی حکام، وفاقی سیکرٹری داخلہ خرم علی آغا تے سینئر حکام وی موجود ہن۔