ملک توں پولیو مکاوݨ کیتے سارے وسائل لائے ویسن، وزیراعظم محمد شہباز شریف

اسلام آباد۔24جون(اے پی پی)وزیراعظم محمد شہباز شریف آکھیے جو وفاقی حکومت صوبائی حکومتاں نال رل تے پولیو مکاوݨ کیتے پرعزم اے، ایں سانڳے سارے وسائل لائے ویسن۔ اے ڳالھ انہاں اسلام آباد اچ پولیو مکاوݨ کیتے قومی ٹاسک فورس دے اجلاس نال خطاب کریندے آکھی۔ انہاں آکھیا جو پولیو مکاوݨ کیتے بل گیٹس فائونڈیشن دا کردار اہم اے ڄئیں بہتر صحت، سماجی شعبے اتے ٻالاں دی ودھوتری کیتے پاکستان اچ خدمات ݙتن، پچھلے سال انسداد پولیو کیتے مالی معاونت اچ 30 فیصد حصہ بل گیٹس فائونڈیشن دا اے، پولیو مکاوݨ کیتے فوری عمل کرݨا ہوسی، سعودی عرب پاکستان اچ پولیو مکاوݨ کیتے آندے 5 سالاں اچ 50 کروڑ ڈالر دا یقین ݙیوائے، پچھلے چھی مہینے اچ انسداد پولیو دی 6 مہمات چلائیاں ڳن، پولیو مکاوݨ سانڳے مسلسل کوششاں کریساں۔ چیئرمین بل گیٹس فائونڈیشن بل گیٹس وی تقریب نال خطاب کیتے اتے آکھیے جو پاکستان نال پولیو مکاوݨ اتے صحت دے شعبیاں اچ ہتھ ونݙاوݨ کوں تیار ہیں، پاکستان اچ ڈیجیٹائزیشن منصوبہ ترجیح اے۔ تقریب اچ وفاقی وزرا، ارکان پارلیمنٹ اتے ٻئے اعلیٰ حکام شرکت کیتی۔