آپریشن عزم استحکام دا مقصد دہشتگرداں دی باقیات، جرائم و دہشت گرد گٹھ جوڑ اتے پرتشدد انتہاپسندی کوں منݙھو مکاوݨ اے، وزیراعظم

اسلام آباد۔25جون(اے پی پی):وفاقی کابینہ کھنݙ دا وادھو ذخیرہ برآمد کرݨ، وزارت تجارت دی سفارش اتے اقوام متحدہ دے عالمی غذائی پروگرام برائے افغانستان دی استدعا تے ٹرکاں دے پرزیاں تے مشتمل ہک کنٹینر دی حد تئیں کراچی توں کابل ٹرانزٹ اجازت ݙے ݙتی ڄݙاں جو وزیراعظم آکھیے جو آپریشن عزم استحکام دا مقصد دہشتگرداں دی باقیات، جرائم و دہشت گرد گٹھ جوڑ اتے پرتشدد انتہاپسندی کوں منݙھو مکاوݨ اے۔ کابینہ دا اجلاس وزیراعظم محمد شہباز شریف دی اقواݨی اچ تھئے۔ وزیر اعظم آکھیا جو عام لوکاں کوں شمسی توانائی دی سہولت کیتے سولر پینلز تے کوئی نویں ڈیوٹی نہ لائی ویسی، معیشت کوںر اہ تے سٹݨ کیتے پوری منصوبہ بندی کریندے پئے ہیں، صنعتاں کوں ترقی ݙے تے ملکی برآمدات ودھیسوں، اشرافیہ اتے ملکی وسائل دا استحصال کرݨ آلیاں دی مراعات مکایان ویسن۔ اجلاس اچ وزیراعظم وژن عزم استحکام بارے ارکان کوں اعتماد اچ ڳھدے۔ انہاں آکھیے جو عزم استحکام آپریشن اچ کہیں نویں اتے منظم مسلح آپریشن دی بجائے پہلے توں جاری انٹیلی جنس دی بنیاد تے کارروائیاں کوں ٻیا تیز کیتا ویسی۔ اجلاس اچ ملکی اداریاں دی نجکاری ڄیویں پاکستان انٹرنیشنل ایئر لائنز دی نجکاری دا ݙسایا ڳیا۔ وفاقی کابینہ وزارت مذہبی امور اتے بین المذاہب ہم آہنگی ڈویژن دی سفارش تے وزارت مذہبی امور، حکومت پاکستان اتے وزارت اسلامی امور، دعوت و رہنمائی سعودی عرب وچال مفاہمتی یادداشت تے دستخط کرݨ دی منظوری ݙے ݙتی۔ وفاقی حکومت سپریم کورٹ دے احکامات سانڳے بہاولپور دے امیر(مرحوم) دی غیر منقولہ جائیداد کیتے ٻݨی عملدرآمد کمیٹی دی مدت اچ مارچ 2025 تئیں توسیع ݙیوݨ سودھا فریکوئنسی ایلوکیشن بورڈ (ایف اے بی)دے ایگزیکٹو ڈائریکٹر دی تقرری دی منظوری ݙتی۔ وزیر اعظم کھنݙ دا مل ہتھیکے رکھݨ کیتے ہک کمیٹی وی ٻݨا ݙتی۔ کابینہ کئی اہم فیصلے کیتن اتے اقتصادی رابطہ کمیٹی دے 13 جون 2024 دے اجلاس دے فیصلاں دی توثیق کیتی۔