پنجاب حکومت دے اقدامات نال مہانگ ڳھٹیے، ایوان اچ حزب اختلاف دا رویہ افسوسناک اے، وزیر اطلاعات پنجاب دی پریس کانفرنس

لاہور۔28جون(اے پی پی)وزیر اطلاعات ونشریات پنجاب عظمی بخاری آکھیے جو پنجاب حکومت دے اقدامات نال مہانگ ڳھٹیے، ایوان اچ حزب اختلاف دا رویہ افسوسناک اے، وزیر اعلیٰ مریم نواز ایوان اچ 100 ݙینھاں دی کارکردگی پیش کر ݙتی اے۔ جمعہ کوں پنجاب اسمبلی دے ٻاھرو پریس کانفرنس کریندے انہاں آکھیا جو حزب اختلاف ایں ٻھل اچ نا رہوے جو او بد تمیزی کر تے پنجاب حکومت کوں دبا ڳھنسی۔ انہاں آکھیے جو بجٹ منظوری دے بعد ریت اے ہے جو وزیر اعلیٰ اپݨا روڈ میپ ݙیندن اتے مریم نواز اپݨے 100 ݙینھ اچ شروع کیتے ڳئے منصوبیاں دا ݙسائے، ہک پاسو وزیر اعلیٰ اپݨی کارکردگی پیش کیتی اے ٻئے پاسو اپوزیشن شور شرابے اچ ردھی ہوئی ہئی، پنجاب اسمبلی اچ ڄیڑھا کڄھ تھئے اوندے بعد فیصلہ کیتے جو اسمبلی اچ اساں وی حزب اختلاف دے کہیں رکن دی تقریر نہ سݨسوں، سپیکر پنجاب اسمبلی کوں ہائوس چلاوݨ کیتے آئینی اقدامات تے عمل کرݨا ہوسی، اساں ایوان دا ماحول خراب کرݨ دی اجازت نا ݙیسوں جو ہݨ ڳالھ برداشت توں ٻاھرو تھی ڳئی اے۔ وزیر اطلاعات آکھیا جو تحریک انصاف کیوں پنجاب دی ترقی توں سڑدی اے جو انہاں کوں بزدار ڄھیاں ڄݨا چاہیدے، ساکوں اپوزیشن ڄھیاں رویہ اپناوݨ تے مجبور نہ کیتا ونڄے، تیکھے صوبے اچ اینڄھا سسٹم ڳھدی آندے ہین جتھاں لوک ہیلپ لائن دے ذریعے شکایت درج کروا سڳسن اتے ایکوں وزیر اعلی مریم نواز آپ مانٹیرنگ کریسن۔(MJM-DSK)