وزیراعظم محمد شہبازشریف اتے تاجکستان دے صدر امام علی رحمان دا ݙوطرفہ تعلقات ٻئے تکڑے کرݨ کیتے کٹھیاں کوششاں تے اتفاق

دوشنبہ۔2 جولائی(اے پی پی) وزیراعظم محمد شہبازشریف اتے تاجکستان دے صدر امام علی رحمان دا ݙوطرفہ تعلقات ٻئے تکڑے کرݨ کیتے کٹھیاں کوششاں تے اتفاق کیتے اتے آکھیے جو آپسی تعلقات اچ بہتری نال کثیر الجہتی تعاون ٻیا ودھاوݨ دیاں نویاں راہین کھلسن۔ وزیراعظم محمد شہبازشریف جمہوریہ تاجکستان دے صدر امام علی رحمان نال ملین۔ سرکاری استقبالیہ تقریب قصر ملت اچ تھئی جتھاں تاجکستان دے صدر وزیر اعظم کوں جی بسم آللہ آکھیے اتے سلامی پیش کیتی۔

بعد اچ وفداں دی سطح تے اتے ون آن ون ڳالھ مہاڑ تھئی۔ ݙوہاں رہنماواں آپسی تعاون کوں تکڑا کرݨ سودھا علاقائی و بین الاقوامی امور تے الایا۔ انہان زور ݙتا جو مشترکہ تاریخ، ثقافت، جغرافیائی مناسبت اتے مشترکہ عقیدے دے تعلقات کوں سارے شعبیاں ڄیویں تجارت و معیشت، سرمایہ کاری، روابط، ثقافت، تعلیم، سائنس و ٹیکنالوجی، دفاع، انسانی امداد، پارلیمانی تبادلیاں اتے عوام دی سطح تے روابط ودھائے ویسن۔ انہاں آپسی تعلقات دی سطح تے امطینان کریندے ݙوہاں ملکاں وچال ڳانݙھا تکڑا کرݨ سانڳے کٹھیاں کوششاں تے اتفاق کیتے۔

انہاں سٹریٹجک پارٹنرشپ دے معاہدے تے دستخط کیتن ڄیڑحا آپسی تعاون کوں طویل المدتی اسٹریٹجک شراکت داری دی سطح تے ڳھن ویسی، ݙوہیں فریقاں ݙوطرفہ تعلقات ٻئے ڳھاٹے کرݨ کیتے، ہوا بازی، سفارت کاری، تعلیم، کھیݙ، عوامی روابط، صنعتی تعاون، سیاحت دے شعبیاں اچ کئی معاہداں اتے مفاہمت دی یادداشتاں تے دستخط کیتن۔ وزیراعظم تاجکستان دے صدر کوں بھارت ولوں مقبوضہ جموں و کشمیر اچ انسانی حقوق دی وڳڑدی صورتحال، آبادیاتی ڈھانچے کوں وٹاوݨ دیاں سازشاں دا وی ݙسایا۔انہاں غزہ دی صورتحال تے وی چنتا کیتے جتھاں اسرائیلی مظالم پاروں تریمتیں، ٻالاں سودھا ہزاراں بے گناہ فلسطینی شہید تھی چکین۔ انہاں مطالبہ کیتے جو عالمی برادری تشددمکاوݨ اتے خطے اچ امن کیتے کوششاںو دھاوے۔ وزیراعظم تاجکستان دے صدر دے سفے تے تاجکستان دے ݙو ݙینھ دے دورے تے ہین۔ ایں توں پہلے بین الاقوامی ہوائی اڈے تے پڄݨ تے تاجکستان دے وزیراعظم  قاہر رسول زادہ وزیراعظم کوں ست بسم اللہ آکھیے۔ݙوہاں رہنماواں دی ایئرپورٹ تے ملاقات وی تھئی۔ وزیراعظم تاجکستان دے دارالحکومت دوشنبہ اچ قصر ملت دے علاوہ اسماعیل سامانی دی یادگار اتے قصر نوروز دا وی دورہ کیتے۔