مصنوعی ذہانت سارے شعبیاں اچ سوکھ پیدا کرݨ، مربوط نظام ٻݨاوݨ کیتے موثر ثابت تھیندی پئی اے، سید یوسف رضا گیلانی دا بہاؤالدین زکریا یونیورسٹی اچ خطاب

ملتان۔ 10 دسمبر (اے پی پی) چیئرمین سینیٹ سید یوسف رضا گیلانی آکھیا جو آرٹیفشل انٹیلیجنس مصنوعی ذہانت سارے شعبیاں اچ سوکھ پیدا کرݨ، مربوط نظام ٻݨاوݨ کیتے موثر ثابت تھیندی پئی اے۔ بہاؤالدین زکریا یونیورسٹی ملتان اچ ’’ انصاف، امن تے مساوات دی فراہمی اچ مصنوعی زہانت دے کردار‘‘ بارے عالمی کانفرنس دی افتتاحی تقریب توں خطاب کریندیں ہوئیں انہاں آکھیا جو اساݙے معاشرے اچ انصاف ڳھنݨ ٻہوں اوکھا اے اتے مقدمے کئی کئی سالاں تئیں پھتے رہندن۔ قانون تے انصاف دے شعبے اچ مصنوعی ذہانت دا استعمال گیم چینجر ثابت تھی سڳدے۔ انہاں آکھیا جو ٹیکنالوجی دے استعمال نال اداریاں کوں مضبوط کیتا ونڄ سڳدے۔  سید یوسف رضا گیلانی ٻیا آکھیا جو پیپلز پارٹی دی حکومت ہمیشہ جنوبی پنجاب اچ ترقیاتی منصوبیاں تے کم کیتے۔  بلاول بھٹو زرداری  ولوں ملتان اچ ہک ارب روپے دا آئی ٹی پارک ٻݨیندے پئیوں۔ ایں توں پہلے گیلانی لا کالج دی پرنسپل ڈاکٹر سمزہ  فاطمہ،ڈائریکٹر ،ڈائریکٹوریٹ آف لیگل ایجوکیشن پنجاب ،بیرسٹر اسامہ مالک،پروفیسرڈاکٹر ہرمن روباو،وائس چانسلر بہاالدین زکریا یونیورسٹی پروفیسر ڈاکٹر زبیر اقبال کانفرنس توں خطاب کیتا۔ تقریب اچ ممبر قومی اسمبلی سید علی موسیٰ گیلانی،ممبر صوبائی اسمبلی رانا اقبال سراج،سابق ایم پی اے چوہدری عبدالوحید آرائیں سودھی سیاسی تے سماجی شخصیات ،قانونی ماہرین،اساتذہ اتے طلبا دی وݙی تعداد شریک ہئی۔