متحدہ عرب امارات دے صدر شیخ محمد بن زاید پاکستان پڄ گئن، پروقار استقبال

اسلام آباد۔26 دسمبر(اے پی پی)وزیراعظم شہباز شریف دی دعوت تے متحدہ عرب امارات دے صدر شیخ محمد بن زاید النہیان پاکستان پڄ گئن۔ معزز مہمان دا پروقار استقبال کیتا ڳیا۔ فضائی حدود اچ داخل تھیندے ای پاک فضائیہ دے لڑاکا طیاریاں یو اے ای صدر دے طیارے کوں حصار اچ ڳھن تے فضائی سلامی پیش کیتی۔ وزیراعظم محمد شہباز شریف، نائب وزیراعظم اسحاق ڈار اتے چیف آف ڈیفنس فورسز فیلڈ مارشل سید عاصم منیر سودھا وفاقی وزراء متحدہ عرب امارات دے صدر دا نور خان ایئر بیس تے استقبال کیتا۔

اماراتی صدر کوں 21 توپاں دی سلامی ݙتی گئی، گارڈ آف آنر وی پیش کیتا ڳیا۔ متحدہ عرب امارات دے صدر شیخ محمد بن زاید ہوائی اڈے تے موجود وفاقی وزراء نال وی ملین۔ شیخ محمد بن زاید دا اے پاکستان دا پہلا دورہ اے، انہاں استقبال کیتے موجود پاکستان دے مختلف ثقافتاں دے نمائندہ ٻالاں تے شفقت کیتی۔ ترجمان دفتر خارجہ دے مطابق صدر متحدہ عرب امارات دے نال وزراء اتے سینئر حکام تے مشتمل ہک اعلیٰ سطح وفد وی پاکستان آئے۔ دورے اچ ݙوہیں ملکاں وچال ݙو پاسہ تعلقات، علاقائی صورتحال اتے عالمی سطح تے سانجھے دلچسپی دے معاملیاں تے ڳالھ مہاڑ کیتی ویسی۔ ترجمان دا آکھݨ اے جو صدر شیخ محمد بن زاید النہیان دا دورہ پاکستان ݙوہیں ملکاں وچال پراݨے اتے برادرانہ تعلقات دی عکاسی کریندے۔ ایں دورے توں تجارت، سرمایہ کاری، توانائی، ترقی اتے علاقائی استحکام دے شعبیاں اچ تعاون کوں ٻیا ودھارا ملݨ دی امید اے۔ دورے اچ معزز مہمان دی صدر مملکت آصف علی زرداری، وزیراعظم شہباز شریف اتے ٻیاں اعلیٰ شخصیات نال ملاقاتاں طے ہین۔ یاد راہوے جو صدر متحدہ عرب امارات دے دورہ پاکستان دی وجہ توں اسلام آباد اچ چھٹی دا اعلان کیتا گئے، اسلام آباد ہائیکورٹ وی چھٹی دا اعلان کیتے۔ رجسٹرار اسلام آباد ہائیکورٹ دے نوٹیفکیشن دے مطابق اسلام آباد ہائیکورٹ اتے اسلام آباد ڈسٹرکٹ کورٹس 26 دسمبر کوں بند رہین۔