اسلام آباد۔ 26 دسمبر(اے پی پی) پاکستان اتے متحدہ عرب امارات معیشت، سرمایہ کاری، توانائی، انفراسٹرکچر دی ترقی، آئی ٹی، ٹیکنالوجی اتے عوامی روابط سودھا مختلف شعبیاں اچ تعاون ودھاوݨ خاص کر ݙو پاسہ تجارت ودھاوݨ تے اتفاق کیتے۔ اے اتفاق اسلام آباد اچ وزیر اعظم شہباز شریف اتے یو اے ای دے صدر و ابوظہبی دے حکمران شیخ محمد بن زاید النہیان دی ملاقات اچ تھئے۔ متحدہ عرب امارات …
پاکستان اتے یو اے ای دا مختلف شعبیاں خاص کر تجارت اچ تعاون ودھاوݨ تے اتفاق
اسلام آباد۔ 26 دسمبر(اے پی پی) پاکستان اتے متحدہ عرب امارات معیشت، سرمایہ کاری، توانائی، انفراسٹرکچر دی ترقی، آئی ٹی، ٹیکنالوجی اتے عوامی روابط سودھا مختلف شعبیاں اچ تعاون ودھاوݨ خاص کر ݙو پاسہ تجارت ودھاوݨ تے اتفاق کیتے۔ اے اتفاق اسلام آباد اچ وزیر اعظم شہباز شریف اتے یو اے ای دے صدر و ابوظہبی دے حکمران شیخ محمد بن زاید النہیان دی ملاقات اچ تھئے۔ متحدہ عرب امارات دے صدر تے ابو ظہبی دے حکمران شیخ محمد بن زاید النہیان وزیراعظم محمد شہباز شریف دی دعوت تے پاکستان دا سرکاری دورہ کیتے۔ اے بطور صدرِ متحدہ عرب امارات انہاں دا پاکستان دا پہلا سرکاری دورہ ہئی۔ پاکستان پڄݨ تے شیخ محمد بن زاید النہیان دا ٻہوں تپاک نال استقبال کیتا ڳئے۔ پاکستانی فضائی حدود اچ داخل تھیندے ای جے ایف-17 لڑاکا طیاریاں شاہی طیارے کوں اپݨے حصار اچ
ڳھدا۔ نور خان ایئر بیس تے وزیراعظم محمد شہباز شریف، نائب وزیراعظم و وزیر خارجہ سینیٹر محمد اسحاق ڈار اتے چیف آف آرمی سٹاف و چیف آف ڈیفنس فورسز فیلڈ مارشل سید عاصم منیر متحدہ عرب امارات دے صدر دا استقبال کیتا، جڈانجو کابینہ دے ٻئے سینئر ارکان اتے اعلیٰ سرکاری حکام وی ایں موقع تے موجود ہن۔ دورے اچ شیخ محمد بن زاید النہیان اتے وزیراعظم محمد شہباز شریف وچال تفصیلی اتے بامعنی ڳالھ مہاڑ تھئی۔ ملاقات اچ پاکستان اتے متحدہ عرب امارات وچال ڳھاٹے برادرانہ تعلقات کوں ٻیا تکڑا ٻݨاوݨ تے وی ڳالھ تھئی۔ ݙوہیں رہنماواں مختلف شعبیاں اچ جاری تعاون دی پیش رفت دا جائزہ گھدا تے باہمی روابط کوں مزید ودھاوݨ دے امکانات تے غور کیتا۔ فریقین معیشت، سرمایہ کاری اتے ٹیکنالوجی سودھا مختلف شعبیاں اچ تعاون دی اہمیت تے زور ݙتے۔ ایندے نال نال ݙو پاسہ تجارت اچ ودھارے دی لورھ تے وی اتفاق کیتا گیا جیندے اچ ترقی دی وݙی گنجائش موجود اے۔ ملاقات وچ علاقائی تے عالمی معاملیاں تے وی گالھ مہاڑ تھئی تے امن و استحکام کیتے قریبی تعاون جاری رکھݨ دا عزم کیتا گیا۔ شیخ محمد بن زاید النہیان دا اے دورہ ڈوہیں ملکاں دی سٹریٹجک شراکت داری وچ ہک اہم سنگِ میل ثابت تھیسی۔
