حکومت دا اعلیٰ سطح دا وفد سابق وزیراعظم محترمہ بے نظیر بھٹو شہید دی برسی دی تقریب وچ شرکت کریسی

اسلام آباد۔ 27 دسمبر (اے پی پی) حکومت دا اعلیٰ سطح دا وفد سابق وزیراعظم محترمہ بے نظیر بھٹو شہید دی برسی دی تقریب وچ شرکت کریسی۔ قومی اسمبلی سیکرٹریٹ توں جاری بیان موجب سپیکر قومی اسمبلی سردار ایاز صادق دی قیادت وچ وفد گڑھی خدا بخش روانہ تھی ڳئے، وفد وچ مشیر وزیراعظم رانا ثناء اللہ، وفاقی وزیر طارق فضل چوہدری تے ارکانِ قومی اسمبلی شامل ہن۔ اے وفد وزیراعظم شہباز شریف دی خصوصی ہدایت تے برسی دی تقریب وچ شرکت کریسی، وفد پیپلز پارٹی دی مرکزی قیادت نال وی ملاقاتاں کریسی۔ سردار ایاز صادق آکھیا جو اڄ اساں پاکستان دی عظیم دھی ، سابق وزیراعظم محترمہ بینظیر بھٹو شہید دی برسی منیندے پیوں۔ بینظیر بھٹو تریمتاں دے کردار کوں تکڑا بݨاوݨ وچ اہم کردار ادا کیتا۔ سپیکر قومی اسمبلی آکھیا جو اقلیتاں دے حقوق دے تحفظ تے پاکستان کوں ہک پرامن، ترقی پسند تے جمہوری ریاست بݨاوݨ کیتے قابلِ قدر اقدامات کیتے۔ انھاں دی قربانیاں تے خدمات قوم کیتے مشعلِ راہ ہن۔ انہاں آکھیا جو بے نظیر بھٹو شہید پاکستان وچ رواداری، برداشت، قانون دی حکمرانی تے عوامی فلاح دے سفر کوں اڳوں ودھایا، اللہ تعالیٰ بینظیر بھٹو شہید کوں جوارِ رحمت وچ اعلیٰ مقام عطا فرماوے، آمین