پاکستان تے ترکیہ دا سماجی تحفظ، خاندانی بہبود تے غربت مکاوݨ دے شعبیں اچ ݙوطرفہ تعاون مزید ودھاوݨ تے متعلقہ وزارتاں وچال ایم او یو وقتی حتمی شکل ݙیوݨ تے اتفاق

اسلام آباد۔14جولائی (اے پی پی) پاکستان تے ترکیہ دا سماجی تحفظ، خاندانی بہبود تے غربت مکاوݨ دے شعبیں اچ ݙوطرفہ تعاون مزید ودھاوݨ تے متعلقہ وزارتاں وچال ایم او یو وقتی حتمی شکل ݙیوݨ تے اتفاق کیتے۔ وزارتِ تخفیفِ غربت و سماجی تحفظ دی ترجمان دے موجب وفاقی وزیر تخفیفِ غربت و سماجی تحفظ سید عمران احمد شاہ تے ترکیہ دی وزیر خاندانی و سماجی خدمات ماہینور اوزدمیر گوکتاش وچال اسلامی تعاون تنظیم (او آئی سی) دی تریمتاں متعلق نویں وزارتی کانفرنس دے موقع تے تھیوݨ آلی ملاقات اچ ایم او یو وقتی حتمی شکل ݙیوݨ تے اتفاق کیتا ڳئے۔ملاقات اچ وفاقی وزیر آکھیا جو پاکستان تے ترکیہ دے تعلقات سانجھے اعتماد تے مشترکہ اقدار تے مبنی ہن تے ݙوہیں ملکاں ہراوکھے ویلھے ہک ٻئے دے رلے کھڑے رہیے ۔انہاں پاکستان دے سماجی تحفظ دے نظام تے بریفنگ ݙیندیں آکھیا جو بینظیر انکم سپورٹ پروگرام، پاکستان بیت المال، پاکستان پاورٹی ایلیوی ایشن فنڈ تے ٻئے ادارے مستحق طبقیں دی فلاح و بہبود تے غربت اچ کمی کیتے اہم کردار ادا کریندے پئن۔ سید عمران احمد شاہ آکھیا جو پاکستان سماجی تحفظ دے شعبے اچ ترکیہ دے جدید ڈیجیٹل نظام، خاندان تے مبنی فلاحی ماڈل تے معذور لوکاں دی شمولیت دے تجربیں توں فیدہ چاوݨ چاہندے۔انہاں پاکستان بیت المال تے ترک تعاون و رابطہ ایجنسی (ٹیکا) وچال جاری مشترکہ منصوبیں خصوصاً رمضان فوڈ پروگرام تے سینٹرلائزڈ کچن منصوبے کوں ݙوطرفہ تعاون دی کامیاب مثال قرار ݙتا۔ ترک وزیر ماہینور اوزدمیر گوکتاش پاکستان دے سماجی تحفظ دے اقدامات، خصوصاً بینظیر انکم سپورٹ پروگرام دی تعریف کریندے آکھیے اے پروگرام مستحق خانداناں دی معاونت تے تریمتاں کوں معاشی طور تے بااختیار بݨاوݨ اچ مؤثر کردار ادا کریندا پئے۔ ݙوہیں وزرا ایں ڳالھ تے اتفاق کیتا جو مفاہمتی یادداشت کوں وقتی حتمی شکل ݙے تے سماجی تحفظ، سماجی بہبود، کمیونٹی ڈویلپمنٹ، عملے دی تربیت تے بہترین تجربیں دے تبادلے اچ تعاون کوں مزید وسعت ݙتی ویسی۔ ملاقات اچ پاکستان اچ ترکیہ دے سفیر عرفان نذیر اوغلو تے ݙوہیں ملکاں دے اعلیٰ حکام شریک ہن۔ بعد اچ وفاقی وزیر سید عمران احمد شاہ ترک وزیر کوں پاکستانی بوچھݨ تے وزارتی شیلڈ پیش کیتی ڄݙاں جو ترک وزیر وی انھاں کوں یادگاری تحفہ پیش کیتا۔