شہیداں دیاں قربانیاں کوں تنخواہ یا مراعات نال نئی تولیا ونڄ سڳدا، مولانا فضل الرحمان شہدا دے خانداناں تے عوام توں معافی منڳن، محمد حنیف عباسی

اسلام آباد۔14جولائی (اے پی پی) وفاقی وزیر ریلوے محمد حنیف عباسی شہدا متعلق مولانا فضل الرحمان دے بیان کوں ݙکھ بھریا قرار ݙیندیں مطالبہ کیتے جو اے ایں بیان تے شہدا دے خانداناں تے عوام توں معافی منڳن، اڄ ایں وطن کیتے جاناں قربان کرݨ آلے شہدا تے غازیاں دے اہلخانہ سودھا 25 کروڑ عوام ݙکھی اے، شہدا دا تاں کوئی مقابلہ یا قیمت نئی تھی سڳدی، جے سیلری یا ٹیکس دی ڳالھ اے تاں میں ترائے گنا ودھ سیلری ݙیوݨ کیتے تیار ہاں کوئی لختِ جگر شہید تھیوݨ کیتے بھڄوا سڳدے۔ اے ڳالھ انھاں اتھاں پریس کانفرنس توں خطاب کریندیں آکھی۔محمد حنیف عباسی آکھیا جو شہدا تے غازی قوم دا ماݨ ہن، انھاں دیاں قربانیاں کوں تنخواہ یا مراعات نال نئی تولیا ونڄ سڳدا، شہدا دیاں قربانیاں تے سیاست نئی ہووݨی چاہیدی۔ انھاں آکھیا جو مولانا فضل الرحمان اڄ وی اساݙے کیتے قابلِ احترام ہن تاں جو شہدا دے اہلخانہ دے جذبات دا احترام پوری قوم دی ذمہ واری اے۔ انھاں دا آکھݨ ہئی جو پاکستان ’لا الٰہ الا اللہ محمد رسول اللہ ﷺ‘ دی بنیاد تے قائم تھیا ڄݙاں جو دہشت گردی دے خلاف آپݨی جاناں دا نذرانہ پیش کرݨ آلے جوان پوری قوم دا ماݨ ہن تے قوم انھاں کوں سلام پیش کریندی اے۔وفاقی وزیر آکھیا جو شہدا تے غازیاں دیاں قربانیاں دی کوئی قیمت نئی لاتی ونڄ سڳدی، پاک فوج دے شہدا پوری قوم دا ماݨ ہن تے انھاں تے انگلی چاوݨ پوری قوم دے جذبات کوں مجروح کرݨ دے مترادف اے۔ انھاں آکھیا جو اختلافِ رائے آپݨی جاہ لیکن شہدا دیاں قربانیاں کوں تنخواہ یا ٹیکس نال جوڑݨ درست کائنی۔ محمد حنیف عباسی آکھیا جو پاکستان دے خلاف پراکسی جنگ کرݨ آلیں کوں ہر قیمت تے شکست ݙتی ویسی، انھاں دے بقول دشمن پاکستان کوں اندروں کمزور کرݨ دی سازش کریندا پئے تانجو دہشت گرداں تے پاکستان دشمن عناصر دے خلاف کارروائیاں پوری قوت نال جاری رہسن۔انھاں آکھیا جو خیبرپختونخوا، بلوچستان، کشمیر تے ملک دے ٻئے حصیں توں تعلق رکھݨ آلے شہدا وطن دے دفاع کیتے آپݨی جاناں دا نذرانہ پیش کیتا، پاکستان دی سلامتی تے عوام دا تحفظ انھاں قربانیاں دا نتیجہ اے، پاک فوج کہیں ہک صوبے دی نی پورے پاکستان دی فوج اے۔ وفاقی وزیر آکھیا جو کشمیر پاکستان دی شہ رڳ اے تے کشمیری قیادت ہمیشہ پاکستان دے نال الحاق دی جدوجہد کیتی۔ انھاں قوم تے زور ݙتا جو دہشت گردی دے خلاف ھک مٹھ تھی کھڑی تھیوے کیوں جو موجودہ حالات قومی اتحاد، یکجہتی تے شہدا دے احترام دے متقاضی ہن۔