پاک فوج دے جواناں دیاں عظیم قربانیاں کوں تنخواہ نال جوڑݨ مناسب کائنی، ایں توں شہدا، انھاں دے اہلخانہ تے قوم دے جذبات مجروح تھئن، بیرسٹر دانیال چوہدری

راولپنڈی۔14جولائی (اے پی پی) وفاقی پارلیمانی سیکرٹری اطلاعات و نشریات بیرسٹر دانیال چوہدری جمیعت علمائے اسلام (ف) دے سربراہ مولانا فضل الرحمان دے اڄوکے بیان تے ردعمل ݙیندیں آکھیے جو پاک فوج دے جواناں دیاں عظیم قربانیاں کوں تنخواہ نال جوڑݨ مناسب کائنی، ایں توں شہدا، انھاں دے اہلخانہ تے پوری قوم دے جذبات مجروح تھئن۔ ہک بیان اچ بیرسٹر دانیال چوہدری آکھیا جو وطن دے دفاع اچ جاناں دا نذرانہ پیش کرݨ آلے سپاہیاں دیاں قربانیاں حب الوطنی، ایمان، فرض شناسی تے جذبہِ ایثار دا مظہر ہن، انھاں کوں مالی معاوضے نال منسوب نی کیتا ونڄ سڳدا۔انھاں آکھیا جو کوئی شخص محض تنخواہ کیتے آپݨی جان قربان نی کریندا ایں دے پچھوں وطن نال محبت، قومی ذمہ واری تے فرض دی ادائیگی دا جذبہ ہوندے۔ وفاقی پارلیمانی سیکرٹری آکھیا جو پاک افواج دے افسران تے جوان روزانہ ملکی دفاع تے عوام دے تحفظ کیتے آپݨی جاناں دا نذرانہ پیش کریندے پئن تے انھاں ہی قربانیاں پاروں ملک اچ امن و استحکام اے۔انھاں آکھیا جو شہادت عظیم رتبہ اے جو حب الوطنی، ایمان تے جذبہِ قربانی توں حاصل تھیندے، ایں کوں کہیں مالی مفاد نال جوڑݨ شہدا دے عظیم مقام کوں گھٹ کرݨ دے مترادف اے۔ انھاں دا آکھݨ ہئی جو شہدا دے اہلخانہ دیاں قربانیاں ناقابلِ تلافی ہن تے پوری قوم انھاں دے صبر و استقامت کوں سلام پیش کریندی اے۔ بیرسٹر دانیال چوہدری آکھیا جو مولانا فضل الرحمان سینئر سیاستدان ہن ایں کیتے انھاں توں زیادہ ذمہ دارانہ طرزِ ڳالھ مہاڑآ دی توقع کیتی ویندی اے۔ انھاں آکھیا جو قومی سلامتی، مسلح افواج تے شہدا متعلق بیانات ݙیندے ویلھے ݙاڈھی احتیاط ورتݨی چاہیدی اے تاں جو کہیں دے جذبات مجروح نہ تھیون۔ انھاں آکھیا جو پوری قوم آپݨے شہدا تے ماݨ کریندی اے تے انھاں دیاں لازوال قربانیاں کوں ہمیشہ عزت و احترام دی نگاہ نال ݙیکھدی رہسی۔