پائیدار تے خوشحال مستقبل دی تعمیر جدید مہارتاں نال لیس نینگراں دے نال ہی ممکن اے، سردار ایاز صادق

اسلام آباد۔14جولائی (اے پی پی) سپیکر قومی اسمبلی سردار ایاز صادق آکھیے جو پاکستان دی 60 فیصد توں ودھ آبادی نینگراں تے مشتمل اے لہٰذا انھاں کوں جدید دور دے تقاضیں نال ہم آہنگ کریندیں فنی، تکنیکی تے پیشہ وارانہ مہارتاں نال آراستہ کرݨ قومی ترقی، معاشی استحکام تے عالمی مسابقت کیتے ناگزیراے، اڄ ٹیکنالوجی دے میدان اچ تکھے انقلابی تبدیلیاں رونما تھیندیاں پئن تے اوہے قوماں ترقی دیاں منازل طے کریندیاں پئن جیڑھیاں آپݨے نینگراں کوں علم، ہنرتے جدید ٹیکنالوجی نال آراستہ کریندیاں پئن۔ انھاں اے ڳالھ نینگراں دی مہارتاں دے عالمی ݙینھ تے آپݨے سنھیے اچ آکھی جیڑھا ہر سال 15 جولائی کوں اقوامِ متحدہ دے اہتمام نال پوری دنیا اچ منایا ویندے۔سپیکرقومی اسمبلی آکھیا جو اڄوکے سال نینگراں دی مہارتاں دے عالمی ݙینھ دا موضوع “سانجھے مستقبل کیتے مہارتاں” ایں حقیقت دی عکاسی کریندے جو پائیدار تے خوشحال مستقبل دی تعمیر جدید مہارتاں نال لیس نینگراں دے نال ہی ممکن اے۔ انھاں آکھیا جو موجودہ دور مصنوعی ذہانت، ڈیجیٹل ٹیکنالوجی، آٹومیشن تے تخلیق دا دور اے، ایں کیتے نوجواناں کوں اِنھاں شعبیں اچ مہارت حاصل کرݨ ویلھے دی اہم لوڑھ اے۔سپیکرسردار ایاز صادق حکومت ولوں نینگراں کوں فنی، پیشہ وارانہ تے جدید مہارتاں نال آراستہ کرݨ کیتے چاتے ڳئے اقدامات دی تعریف کریندے آکھیے جو اے پروگرام نینگراں کوں مستقبل دیاں ضرورتاں نال ہم آہنگ بݨاوݨ اچ اہم کردار ادا کریندے پئن۔ سپیکر قومی اسمبلی آکھیا جو پارلیمان نینگراں اچ فنی و پیشہ وارانہ تعلیم، جدید مہارتاں، تحقیق تے جدت دے ودھارے کیتے مؤثر قانون سازی کیتے پرعزم اے۔ انھاں آکھیا جو قومی اسمبلی دا ینگ پارلیمنٹرینز فورم نینگراں اچ جدید ٹیکنالوجی، ڈیجیٹل مہارتاں تے تخلیقی صلاحیتاں دے ودھارے کیتے مختلف تربیتی ورکشاپا تے آگاہی پروگراماں دے نال فعال کردار ادا کریندا پئے۔