چیئرمین سینیٹ سید یوسف رضا گیلانی دا اوورسیز پاکستانی کاروباری برادری نال تکڑی شراکت داری، سرمایہ کاری تے معاشی تعاون دے ودھارے تے زور

اسلام آباد۔14جولائی (اے پی پی) چیئرمین سینیٹ پاکستان سید یوسف رضا گیلانی آکھیے جو اوورسیز پاکستانی ملک دا قیمتی اثاثہ تے پاکستان دے حقیقی سفیر ہن جیڑھے آپݨی دیانت، محنت، پیشہ وارانہ صلاحیتاں تے کاروباری کامیابیاں دے ذریعے نہ صرف پاکستان دا مثبت تشخص دنیا اچ اڳونہا کریندے پئن بین الاقوامی منڈیاں، سرمایہ کاری، جدید ٹیکنالوجی تے معاشی موقع کوں پاکستان نال جوڑݨ اچ وی کلیدی کردار نبھیندے پئن۔انھاں اے ڳالھ سینیٹ آف پاکستان اچ نیویارک چیمبر آف سمال بزنس کارپوریشن، امریکہ دے بانی صدر سید علمدار حسین شاہ دی قیادت اچ امریکہ، متحدہ عرب امارات، قطر تے پاکستان توں تعلق رکھݨ آلے ممتاز کاروباری رہنماواں تے مشتمل وفد دے اعزاز اچ ݙتے ڳئے ظہرانے توں خطاب کریندیں آکھی ۔چیئرمین سینیٹ وفد دا خیرمقدم کریندیں آکھیا جو انھاں دا دورہ ایں امر دا مظہر اے جو اوورسیز پاکستانی کاروباری برادری پاکستان دی معاشی ترقی، سرمایہ کاری دے ودھارے تے قومی خوشحالی اچ بھرپور کردار ادا کرݨ کیتے پرعزم اے۔ انھاں آکھیا جو قانون سازاں، حکومتی اداریں تے مقامی کاروباری حلقیں دے نال وفد دیاں ملاقاتاں ݙو پاسے اعتماد، تعاون تے تکڑے معاشی رابطے دے ودھارے اچ اہم سنگِ میل ثابت تھیسن۔سید یوسف رضا گیلانی یومِ آزادیِ پاکستان دے موقع تے پیش کیتے ڳئے تعریفی کلمات تے وفد دا شکریہ ادا کریندیں آکھیا جو او ایں اعزاز کوں ذاتی کامیابی نی پاکستان، ایں دے جمہوری اداریں تے دنیا اچ رہݨ آلے لکھاں پاکستانیاں دی خدمات دے اعتراف دے طور تے قبول کریندن جنھاں آپݨی صلاحیتاں تے کردار دے ذریعے ملک دا وقار اُچا کیتے۔ چیئرمین سینیٹ آکھیا جو تجارت تے سرمایہ کاری اعتماد کوں ودھارا ݙیندن تے ڄݙاں کاروباری ادارے رل کراہیں ترقی کریندن تاں ملکاں وچال تعلقات مزید تکڑے بݨ ویندن۔ انھاں آکھیا جو وفد دا دورہ پاکستان دی معیشت تے اعتماد تے روشن مستقبل تے یقین دا اظہار اے۔انھاں آکھیا جو پاکستان نینگر آبادی، تکھے ودھدی ڈیجیٹل معیشت، منفرد جغرافیائی محلِ وقوع تے قدرتی وسائل دی پاروں سرمایہ کاری دے بے شمار موقع ݙیندے۔ حکومت سرمایہ کاراں کیتے سازگار ماحول ݙیوݨ ، کاروبار اچ سوکھ تے معاشی اصلاحات دے ایجنڈے تے مسلسل عمل کریندا پئے جݙاں جو سپیشل انویسٹمنٹ فیسیلیٹیشن کونسل (ایس آئی ایف سی) ملکی و غیر ملکی سرمایہ کاراں کیتے سہولت تے ادارہ جاتی ہم آہنگی کوں مزید مؤثر بݨاوے۔ آپݨے خطاب دے چھیکڑ تے چیئرمین سینیٹ سید یوسف رضا گیلانی وفد کیتے نیک تمناؤں دا اظہار کریندیں آکھیا جو انھاں کوں یقین اے جو انھاں دا اے دورہ پاکستان تے دنیا اچ رہݨ آلی پاکستانی کاروباری برادری وچال معاشی تعاون، سرمایہ کاری تے تجارتی رابطے دے ودھارے اچ ہک اہم سنگِ میل ثابت تھیسی تے ݙوہیں پاسوں شراکت داری کوں مزید مستحکم کریسی۔