تیزی نال ودھدی ہوئی آبادی پاروں ہسپتالاں، تعلیمی اداریاں اتے بنیادی ڈھانچے تے شدید دباؤ اے، وفاقی وزیرِ صحت

اسلام آباد۔15جولائی (اے پی پی) وفاقی وزیرِ صحت سید مصطفیٰ کمال آکھیا جو پاکستان اچ تیزی نال ودھدی ہوئی آبادی پاروں ہسپتالاں، تعلیمی اداریاں تے بنیادی ڈھانچے تے شدید دباؤ اے، جئیں دے نتیجے اچ عوام کوں معیاری خدمات دی فراہمی متاثر تھیندی پئی اے، ہک ڈاکٹر جتھاں روزانہ محدود تعداد اچ مریضاں دا علاج کر سڳدے، اتھاں ایں کوں کئی گنا ودھ مریضاں کوں ݙیکھݨا پوندے۔ اے ڳالھیں انھاں عالمی یومِ آبادی دے حوالے نال تھیوݨ آلے سیمینار توں خطاب کریندیں ہوئیں کیتا۔ وفاقی وزیر آکھیا جو قرآنِ مجید اچ ہک انسان دی جان بچاوݨ کوں پوری انسانیت دی جان بچاوݨ دے برابر قرار ݙتا ڳئے، ایں کیتے آبادی دے مسئلے تے علما، اساتذہ تے معاشرے دے تمام طبقات کوں مل کراہیں عوام اچ درست شعور اڳونہا کرݨا پوسی۔ انھاں آکھیا جو رزق ݙیوݨ اللہ تعالیٰ دی ذمہ داری اے، تاہم والدین تے لازم اے جو او آپݨی صحت، وسائل تے ٻالیں دے بہتر مستقبل کوں ݙیکھدیں ہوئیں ذمہ دارانہ فیصلے کرن۔ مصطفیٰ کمال ݙسایا جو پاکستان اچ ہر سال تقریباً 11 ہزار ماواں حمل یا زچگی دے دوران جان دی بازی ہر ویندن، جیہڑی ݙاݙھی تشویشناک صورتحال اے۔ انھاں آکھیا جو اگرچہ حمل کوئی بیماری کائنی، ٻھل مناسب طبی سہولیات تے بروقت نگہداشت دے ذریعے زچگی دے دوران اموات اچ نمایاں ڳھٹکی کیتی ونڄ سڳدی اے۔ انھاں ایں امر تے زور ݙتا جو ہر ماں دی جان بچاوݨ قومی ذمہ داری اے۔ مصطفیٰ کمال واضح کیتا جو آبادی دا مسئلہ کہیں ہک طبقے یا مخصوص سوچ دے خلاف نئی بلکہ ہک قومی تے معاشی مسئلہ اے، جئیں دا حل متوازن تے حقیقت پسندانہ پالیسیاں دے ذریعے کڈھیا ونڄ سڳدے۔ انھاں تجویز ݙتی جو آبادی اچ مناسب وقفہ اختیار کرݨ آلے خاندانوں کیتے مراعات تے ترغیبات تے وی غور کیتا ونڄݨا چاہیدے۔وفاقی وزیرِ صحت ݙسایا جو حکومت مانع حمل اشیاء تے عائد ٹیکس کوں صفر کر ݙتے۔ انھاں آکھیا جو ایں فیصلے نال اے مصنوعات سستیاں تھیسن، عوام دی رسائی اچ اضافہ تھیسی، مقامی صنعت کوں ودھارا ملسی اتے نویں سرمایہ کاری دے مواقع وی پیدا تھیسن۔وفاقی وزیرِ صحت مصطفیٰ کمال مزماناں دا خصوصی شکریہ ادا کریندیں ہوئیں آکھیا جو انھاں آپݨی مصروفیات دے باوجود تقریب اچ شرکت کیتی، جئیں تے او تے تمام شرکاء انھاں دے شکر گزار ہن۔